एमालेको राष्ट्रिय कार्यकर्ता भेलाको तयारी तीव्र
ललितपुर। नेपाल कम्युनिस्ट पार्टी (एमाले) ले आगामी मङ्सिर २ र ३ गते काठमाडौँमा आयोजना गर्न लागेको राष्ट्रिय कार्यकर्ता भेलाको तयारी तीव्र पारेको छ । भेलामा देशभरबाट नेता, जनप्रतिनिधि तथा पार्टीका विभिन्न तहका प्रतिनिधि गरी तीन हजारभन्दा धेरै सहभागी हुने एमालेले उल्लेख गरेको छ ।
भेलाको तयारीबारे समीक्षा गर्न पार्टी केन्द्रीय कार्यालय च्यासलमा शुक्रबार सचिव तथा सङ्गठन विभाग प्रमुख भानुभक्त ढकालको अध्यक्षतामा बसेको बैठकले व्यवस्थापन र सहभागितासम्बन्धी तयारीको समीक्षा गरेको एमाले प्रचार विभागका प्रमुख नीरज आचार्यले जानकारी दिनुभयो ।
बैठकमा पार्टी महासचिव शङ्कर पोखरेलले स्थानीय निर्वाचनको तयारीलाई केन्द्रमा राखेर पार्टीका नेता तथा कार्यकर्तामाझ साझा सन्देश प्रवाह गर्नु भेलाको मुख्य उद्देश्य रहेको बताउनुभयो । भेलालाई एमालेका अध्यक्ष केपी शर्मा ओली, वरिष्ठ नेता विद्यादेवी भण्डारी, उपाध्यक्ष रामबहादुर थापा र विष्णु पौडेल तथा महासचिव शङ्कर पोखरेलले सम्बोधन गर्ने कार्यक्रम छ ।
