सर्लाही सदरमुकाम मलङ्गवाको अवस्था सामान्य, खुल्न थाले पसल
सर्लाही । सर्लाही सदरमुकाम मलङ्गवाको अवस्था सामान्य बनेको छ । शुक्रबार बिहान केहीबेर असहज स्थिति सिर्जना भए पनि अपरान्हदेखि सदरमुकामको अवस्था सामान्य बनेको हो ।
टायर बालेर प्रदर्शन हुँदा मलङ्गवामा बिहानभर बन्द भएका पसल, व्यवसाय क्रमिक रुपमा खुल्न थालेका छन् । बजार खुल्न थालेपछि मानिस अत्यावश्यक चिजवस्तु खरिद गर्न निस्किएका छन् । मोटरसाइकलसहित अन्य निजी सवारीमा मानिस महेन्द्र राजमार्गसम्म निर्वाध आउजाउ गरिरहेका छन् ।
मलङ्गवाबाट छुट्ने तथा भित्रिने बस सञ्चालन नभए पनि काठमाडौँबाट छुटेर आएका साना गाडी, मोटरसाइकल, टेम्पु लगायतका सवारी साधन निर्वाध रुपमा सञ्चालन भइरहेका छन् । कुनै पनि प्रदर्शनकारी नदेखिएकाले मलङ्गवा बजार क्षेत्रको अवस्था सामान्य बनेको हो ।
सर्लाहीका प्रमुख जिल्ला अधिकारी विजयराज सुवेदीले मलङ्गवासहित जिल्लाभरको अवस्था सामान्य रहेको बताउनुभएको छ । बरहथवा र बयलवास बजार बन्द भए पनि जिल्लाको लालबन्दी, हरिवन, नयाँरोड, हरिपुर लगायतका बजार निर्वाध रुपमा खुलिरहेका छन् ।
सामाजिक सद्भाव कायम राख्ने उद्देश्यले महेन्द्र राजमार्गस्थित हरिवन र लालबन्दीमा शनिबार बिहान सद्भाव ¥याली निकाल्ने तयारी गरिएको छ ।
