खेलकुद

किङ्स कप राष्ट्रिय भलिबलमा तीन विभागीय सहित ६ टोली सहभागी हुने 

पोखरा । पोखरामा आयोजना हुने प्रथम किङ्स कप राष्ट्रिय आमन्त्रित पुरुष भलिबल प्रतियोगिता–२०८३ मा तीन विभागीयसहित ६ टोलीबिच प्रतिस्पर्धा हुने भएको छ । 

युनाइटेड किङ्स क्लब पोखराको आयोजनामा मङ्सिर ९ देखि १५ गतेसम्म पोखरा रङ्गशालास्थित भलिबल ट्रेनिङ सेन्टरमा प्रतियोगिता सञ्चालन हुने प्रतियोगिता संयोजक थमन गुरुङले जानकारी दिनुभयो ।

प्रतियोगितामा त्रिभुवन आर्मी क्लब, सशस्त्र प्रहरी बलको एपीएफ क्लब, नेपाल पुलिस क्लब, घरेलु टोली गण्डकी प्रदेश भलिबल सङ्घ, कोशी प्रदेश भलिबल सङ्घ र रुकुम पश्चिम भलिबल प्रशिक्षण केन्द्रको सहभागिता रहने भएको उहाँले जनाउनुभयो ।

क्लबका अध्यक्ष अशोक गुरुङले प्रतियोगिताको तयारी अन्तिम चरणमा पुगेको बताउनुभयो ।

खेल संयोजक बुद्ध सिंहका अनुसार सहभागी टोलीहरू प्रतियोगिताका लागि तयारी अवस्थामा रहेका छन् ।

प्रतियोगिताको विजेता टोलीले नगद ४ लाख रुपैयाँ पुरस्कार प्राप्त गर्नेछ । उपविजेताले २ लाख ५० हजार, तृतीय हुने टोलीले १ लाख र सान्त्वना हुने टोलीले ५० हजार रुपैयाँ प्राप्त गर्नेछन् । त्यस्तै, प्रतियोगिताको सर्वोत्कृष्ट खेलाडीलाई २० हजार रुपैयाँ प्रदान गरिनेछ । उत्कृष्ट सर्भर, सेटर, ब्लकर, लिब्रो, स्पाइकर र प्रशिक्षकलाई जनही १० हजार रुपैयाँ पुरस्कारको व्यवस्था गरिएको सचिव अशोक थापाले बताउनुभयो ।

प्रतियोगिताका लागि क्लबले सिजनल टिकटको अग्रिम बुकिङसमेत खुला गरेको छ । सिजनल टिकटको मूल्य २ हजार ५०० रुपैयाँ निर्धारण गरिएको छ । प्रतियोगिताभरिका खेल अवलोकन गर्न चाहने दर्शकले अग्रिम टिकट बुकिङ गर्न सक्ने आयोजकले जनाएको छ ।

प्रतियोगिता सञ्चालनका लागि करिब ६० लाख ९५ हजार रुपैयाँ खर्च हुने अनुमान गरिएको छ भने विभिन्न प्रायोजक, सरकारी निकाय, टिकट बिक्री, सहयोगी संस्था तथा सञ्चार माध्यम लगायतका स्रोतबाट ७१ लाख रुपैयाँ आम्दानी गर्ने लक्ष्य राखिएको छ ।

यसअघि मङ्सिर १ देखि ६ गतेसम्म सञ्चालन गर्ने तय भएको प्रतियोगिता काभा पुरुष भलिबल लिगका कारण सारिएको क्लबले जनाएको छ । भारतमा नोभेम्बर १५ देखि २२ (कात्तिक २९ देखि मङ्सिर ६ गते) सम्म आयोजना हुने काभा पुरुष भलिबल लिगमा नेपाली राष्ट्रिय टोली सहभागी हुने भएपछि राष्ट्रिय खेलाडीको सहभागिता सुनिश्चित गर्न प्रतियोगिताको मिति परिवर्तन गरिएको आयोजकले जनाएको छ ।

About the author
The Himalayan Voice

The Himalayan Voice

'कम्युनिटी न्युज नेटवर्क एलएलसी' अन्तर्गत सञ्चालित 'Thehimalayanvoice.com' अनलाइन समाचार सेवा हो। यसले पत्रकारिताका मूल्य-मान्यता र आचार संहिता अनुरूप सन्तुलित, सत्य र तथ्यपरक भूमिका निर्वाह गर्दै चौबीसै घण्टा र साताको सातै दिन अंग्रेजी तथा नेपाली भाषामा राष्ट्रिय र अन्तर्राष्ट्रिय समाचारहरू निरन्तर सम्प्रेषण गर्दछ।

Himalayan Voice Newsletter

News delivered directly to your inbox

Subscribe for important headlines, community updates, and selected stories.

टिप्पणी लेख्नुहोस्