छोडपत्र

कति प्रयोग गरेँ तिमीलाई

उपयोग तिमीलाई कति गरेँ

भन्न सक्दिनँ, तर

दुरुपयोग गरेको चाहिँ बुझेको छु, धेरै

तन्तन्याएर वशमा राख्न सकिनँ, तर

जिन्दगीभरि तन, मनमा स्पर्श चुम्बन गरिरह्यौँ

मैले त छोड्नै सक्दिनँ, अँगालोमै

तिमी चिप्लिरह्यौ ।

त्यस्तो सान्निध्यता खै कससँग होला र

लाग्दैन, तिम्रो सट्टा अरू कोही केही छ, किनकि

बिउँझिएर हेर्दा तिमी साथमै छौ

निद्रामा पनि लुटुपुटु गर्दै जिन्दगी

मैले ठानेको सर्वस्व यही हो,

बुझ्दाबुझ्दै गुज्रिएर बुझेको हो

यति चिप्लो त तिमी नै हौ, तर

सधैँ साथमा, माथमा पनि थियौ

भोगेँ मज्जैले भोगेँ, तर कसरी,

सधैँ आलिङ्गनमा टाँसिएर

न हात नै उचाल्न सकेँ

न तिमीलाई छोड्न नै सकेँ

तिमीले पनि त साथ, अहिलेसम्म दिएकै हौ

टाँसिएर चुम्बन,

तिम्रो साथ त छ तर कति अंश बाँकी छ

मेरानिम्ति अपरिचित तिमीले

धन्य हो, सधैँ साथ दियौ, साथ लियौ

मैले चिनिनँ, तर नचिन्दै

तिमी त छोडपत्र लेख्न थालिछौ

विवश छु म

जिन्दगी साथ दिनेको छोडपत्र मान्न, किनकि

कसैले काल भने, कसैले बेला

समुच्चा बुझ्न, तिमी समय हौ । बस्…