गीतकार दिनेश अधिकारीको एकल काव्य साँझ पेरिसमा सम्पन्न
पेरिस । कवि तथा गीतकार दिनेश अधिकारीको एकल काव्य साँझ आयोजना गरिएको छ । फ्रान्सको पेरिसमा आदिकवि भानुभक्त आचार्यको २१३ औँ जन्मजयन्तीका अवसरमा उक्त साँझ आयोजना गरिएको हो ।
साहित्य समाज (अनेसास) फ्रान्स च्याप्टरको संयुक्त आयोजनामा सम्पन्न कार्यक्रममा कवि तथा गीतकार अधिकारीले करिब दुई दर्जन आफ्ना कविता तथा गीत वाचन गर्नुभएको थियो ।
कार्यक्रमका प्रमुख अतिथि फ्रान्सका लागि नेपालका राजदूत सुधीर भट्टराईले फ्रान्समा पनि नेपाली भाषा पाठशाला सञ्चालन गर्नुपर्ने धारणा व्यक्त गर्नुभयो । राजदूत भट्टराईले फ्रान्समा नेपाली समुदायको बाक्लो उपस्थिति रहेकाले पेरिसमा स्रष्टाबाटै गीतसङ्गीत सुन्ने अवसर प्राप्त हुनु सुखद भएको बताउनुभयो ।
अनेसास फ्रान्सका अध्यक्ष प्रशान्त उप्रेतीको सभापतित्वमा सम्पन्न कार्यक्रममा राम पाण्डे, हरिहर अर्याल र सुमित्रा बुर्लाकोटीले आआफ्ना मन्तव्य राख्नुभएको थियो । गायक रन बराइलीले गीतकार अधिकारीका दुई गीत सुनाउनुभएको थियो ।
