देउवा समूहद्वारा शशांक कोइरालाको नेतृत्वमा राष्ट्रिय भेला आयोजक समिति गठन

काठमाडौँ । नेपाली कांग्रेसको शेरबहादुर देउवा समूहले शशांक कोइरालाको नेतृत्वमा ५ सय ५१ सदस्यीय राष्ट्रिय भेला आयोजक समिति गठन गरेको छ।

शनिबार सम्पर्क कार्यालय चुनदेवीमा पत्रकार सम्मेलन गर्दै देउवा समूहले डा. शशांक कोइरालाको संयोजकत्वमा राष्ट्रिय भेला आयोजक समिति गठन गरिएको जानकारी गराइएको हो।

देउवा समूहले साउन २९ गते काठमाडौँमा भेला गर्दै छ। विशेष महाधिवेशनबाट गगन थापा कांग्रेस सभापति भएपछि देउवा समूह असन्तुष्ट रहँदै आएको छ।

पार्टी एकताका लागि सभापति थापा इच्छुक नदेखिएको र आफूहरू राष्ट्रिय भेला गर्ने अवस्थामा पुगेको संयोजक कोइरालाले बताए।