नेपाल महिला सङ्घको अध्यक्षमा मीनाकुमारी खरेल, महाधिवेशन फागुनमा
ललितपुर । नेपाल महिला सङ्घको अध्यक्षमा मीनाकुमारी खरेल नियुक्त भएकी छिन । नेपाली कांग्रेसको केन्द्रीय कार्यसम्पादन समितिको निर्णय अनुसार सभापति गगनकुमार थापाले अध्यक्षमा खरेललाई नियुक्त गर्दै १७ बुँदे कार्यादेश र कार्यविवरणसहित जिम्मेवारी प्रदान गरेका हुन् ।
अध्यक्ष खरेलले फागुन १५ गते भित्र सङ्घको केन्द्रीय महाधिवेशन सम्पन्न गर्ने गरी केन्द्रीय निर्वाचन समितिसँग समन्वय गरेर साउन १ गतेभित्र महाधिवेशनको विस्तृत कार्यतालिका पार्टीसमक्ष पेस गर्ने जिम्मेवारी पाएकी हुन् ।
कार्यवाहक मुख्य सचिव कृष्णप्रसाद दुलालका अनुसार नेपालको संवैधानिक व्यवस्था र यसको मर्म अनुसार महिलाको प्रतिनिधित्व, अर्थपूर्ण सहभागिता र सशक्तीकरणका लागि नीति, योजना र कार्यक्रम तय गर्ने जिम्मेवारी दिइएको बताए ।
अध्यक्ष खरेलले नेपालको महिलासम्बन्धी सबै विद्यमान नीति, ऐन र कानुन अध्ययन गरेर पार्टीलाई आवश्यक सल्लाह, सुझाव दिने र लैङ्गिक विभेदविरुद्ध र लैङ्गिक समानताका पक्षमा अभियान सञ्चालन गर्ने तथा महिलालाई शिक्षा, स्वास्थ्य, रोजगार, व्यावसायिक तालिम र सामाजिक सशक्तीकरणमा सहयोग गर्न आवश्यक कार्ययोजना बनाउने, महिला अधिकार र महिलासम्बन्धी राष्ट्रिय–अन्तर्राष्ट्रिय चासोका विषयमा पार्टीलाई आवश्यक सल्लाह सुझाव दिने जिम्मेवारी पाएकी छिन ।
