मुगुको चुच्चेमारामा अलपत्र परेका १२ जनाको नेपाल सेनाद्वारा सकुशल उद्धार
सुर्खेत । मुगुस्थित प्रसिद्ध राराताल घुम्न गएको एक समूह जङ्गलमा हराएपछि नेपाली सेनाले उद्धार गरेको छ ।
मुगुको छायाँनाथ रारा नगरपालिका–८, चुच्चेमारा क्षेत्रको जङ्गलमा अलपत्र परेका १२ जनाको एक समूहलाई नेपाली सेनाले सकुशल उद्धार गरेको हो । गएराती रारा भ्रमणमा निस्किएको उक्त समूह चुच्चेमारा क्षेत्रमा अलपत्र परेको जानकारी पाउनासाथ नेपाली सेनाको हनुमानध्वज गुल्मबाट खटिएको टोलीले सुरक्षित रुपमा उद्धार गरेको जनाएको छ ।
हनुमानध्वज गुल्मका प्रमुख (मेजर) खड्कबहादुर श्रेष्ठले गएराती १० बजेर २५ मिनेटमा चुच्चेमारा क्षेत्रको मध्य भागबाट ८ जना महिला र ४ जना पुरुषको सकुशल उद्धार गरिएको बताउनु भयो । उहाँले उक्त समूह मुगुदेखि पैदल जुम्ला जाने क्रममा बाटो भुलेर जङ्गलमा अलपत्र परेपछि उद्धार गरी सुरक्षित सल्लेरी ल्याइएको जनाउनु भयो । त्यहाँबाट राती नै मुगु प्रहरीको सहयोगमा जुम्लाको चन्दननाथ नगरपालिका–२, भण्डारीवाडा गाउँ पुर्याइएको उहाँको भनाइ छ ।
करिब चार घण्टा जङ्गलमा अलपत्र परेका सबै जना जुम्लाको चन्दननाथ–२, भण्डारीवाडा हुन् ।
