फ्रान्की मुनिज र पेज प्राइसको जोडीले १० वर्ष लामो वैवाहिक सम्बन्ध अन्त्य गर्दै

लस एन्जलस । फ्रान्की मुनिज र उनकी श्रीमती पेज प्राइस १० वर्ष लामो वैवाहिक सम्बन्ध अन्त्य गर्दैछन्। यो जोडीले बुधबार इन्स्टाग्राममा मुनिजको भनाइ सहितको एक संयुक्त पोस्ट गर्दै १० वर्ष लामो वैवाहिक सम्बन्ध अन्त्य गर्न लागेको पुष्टि गरे ।

“सँगै बिताएका १० सुन्दर वर्षहरूमा हामीमा यस्तो विकास भयो जसले हामीलाई यो महसुस गरायो कि हाम्रो सम्बन्ध गहिरो मित्रता र सह-अभिभावकको रूपमा सबैभन्दा स्वाभाविक र बलियो छ,” उनले लेखे। “हाम्रो एउटा अद्भुत छोरा छ जो हाम्रो संसारको केन्द्रबिन्दु हो, र हामीले साझा गरेको प्रेम तथा व्यक्तिगत विकासका कारण हामी दुवै अझ खुसी र बलिया अभिभावक बनेका छौं।”

मुनिजले अगाडि भने, “मेरो र हाम्रो परिवारका लागि पेजले गरेका सबै कामप्रति म उनीप्रति सदैव आभारी रहनेछु। मैले मेरा सपनाहरू पछ्याउन सकूँ भनेर उनले आफ्ना सपनाहरूलाई थाती राखिन् र उनी सधैं मेरी सबैभन्दा ठूलो समर्थक रहिन्। सम्मान र मित्रताको त्यो जग कहिल्यै मेटिने छैन।”

‘माल्कम इन द मिडल: लाइफ्स स्टिल अनफेयर’का स्टारले भने कि उनीहरू अलग हुने खबरका बाबजुद पनि ‘मुनिज रेसिङ’लाई सँगै अघि बढाउनेछन् र सन् २०२१ मा जन्मिएका आफ्ना छोरा, माउज मोस्ली मुनिजको सह-अभिभावकको भूमिका निर्वाह गरिरहनेछन्।

फ्रान्की मुनिजले लेखे, “हामी कृतज्ञताका साथ एउटा अध्याय बन्द गर्दैछौं र उज्ज्वल भविष्यको कामनासहित अर्को अध्यायको सुरुवात गर्दैछौं ।व्यक्तिगत रूपमा हाम्रा लागि र विशेष गरी हाम्रो छोराका लागि। तपाईंहरूको माया र सहयोगका लागि धन्यवाद।”

उनले थपे, “हामी दुवैजना यस विषयमा कुनै पनि प्रश्नको जवाफ नदिने निर्णय गर्छौं। कृपया यस समयमा हाम्रो परिवारको गोपनीयताको सम्मान गरिदिनुहोला।”

‘पिपुल्स’ पत्रिकाका अनुसार, मुनिज र प्राइसको भेट सन् २०१६ मा भएको थियो र उनीहरूको इन्गेजमेन्ट सन् २०१८ को नोभेम्बरमा भएको थियो। उनीहरूले सन् २०१९ को अक्टोबरमा गोप्य रूपमा विवाह गरेका थिए भने सन् २०२० को फेब्रुअरीमा औपचारिक विवाह समारोह आयोजना गरेका थिए।

उनीहरूका छोराको जन्म २२ मार्च २०२१ मा भएको थियो।

अप्रिल महिनामा, ‘माल्कम इन द मिडल: लाइफ्स स्टिल अनफेयर’को न्युयोर्क सहरमा भएको प्रिमियरमा प्राइसले मुनिजलाई साथ दिएकी थिइन्।