फिफाका प्रमुख सञ्चालन अधिकृत केभिन लामोर बर्खास्त
जेनेभा । फिफाका प्रमुख सञ्चालन अधिकृत केभिन लामोर बर्खास्त भएका छन् ।
प्रतियोगिताहरूमा निजी लगानीकर्तालाई हिस्सेदारी विक्री गर्ने अध्यक्ष जियानी इन्फान्टिनोको योजनाको कडा आलोचना गरेको तीन साता नपुग्दै उनलाई फिफाले बर्खास्त गरेको हो ।
फिफाका प्रवक्ताले जारी गरेको विज्ञप्तिमा प्रमुख सञ्चालन अधिकृतका रूपमा फिफा र केभिन लामोरबीचको कार्य सम्बन्ध १७ अगस्ट २०२६ मा समाप्त भएको उल्लेख छ । फिफाले केभिनलाई उनको दुई वर्षको सेवाका लागि धन्यवाद दिँदै भविष्यका लागि शुभकामना समेत दिएको छ ।
फिफाका कर्मचारीहरूलाई महासचिव म्याथियास ग्राफस्ट्रोमले पठाएको इमेलमार्फत यसको जानकारी दिइएको थियो, जसमा संस्था र लामोर बीच अलग हुने सहमति भएको बताएका थिए ।
लामोर नोभेम्बर २०२४ मा फिफामा प्रवेश गरेका थिए । त्यसअघि उनी युइएफएमा उप–महासचिवका रूपमा कार्यरत थिए र उनी इन्फान्टिनोभन्दा व्यवस्थापनको तहमा दुई तह तल थिए ।
यस महिना मोरक्कोमा भएको बैठकमा इन्फान्टिनोले वरिष्ठ अधिकारीहरूको समर्थन प्राप्त गरेका थिए तर लामोरलाई सो बैठकमा आमन्त्रित नगरिएको अन्तर्राष्ट्रिय सञ्चारमाध्यमले बताएका छन् ।
