मेडिकल व्यवसायी प्रसाईँ दुर्गा थुनामुक्त
काठमाडौँ । जिल्ला अदालत भक्तपुरले मेडिकल व्यवसायी दुर्गा प्रसाईँलाई हिरासतमा राख्नुपर्ने गरी म्याद थप गर्न नपर्ने आदेश दिएको छ ।
न्यायाधीश नवराज दाहालको इजलासले मेडिकल व्यवसायी प्रसाईँ विरुद्ध म्याद थप गर्न नपर्ने आदेश दिएको हो । अदालतले म्याद थप नगरेसँगै प्रसाईँ थुनामुक्त हुनुभएको छ ।
आदेशमा भनिएको छ, “अनुसन्धान गर्न यी प्रतिवादीलाई हिरासतमा नराखिए प्रमाण नष्ट गर्ने वा भागी जान सक्ने अवस्थासमेत वादी पक्षबाट ठोस आधार पेस हुन आएको नहुँदा हिरासतमा राख्ने गरी म्याद थपसम्मको अवस्था देखिएन ।”
मेडिकल व्यवसायी प्रसाईँमाथि साइबर अपराधको कसुर, राज्यविरुद्धको कसुरअन्तर्गत सार्वजनिक नैतिकता, शिष्टाचार विरुद्धको कसुर र सार्वजनिक शान्ति विरुद्धको कसुर गरी तीन कसुरमा म्याद थप गर्न सरकारी वकिल कार्यालयमार्फत अदालतमा उपस्थित गराइएको थियो भने सात दिनको म्याद थप्न माग गरिएको थियो । उक्त अभियोगमा प्रहरीले प्रसाईँलाई आइतबार राति पक्राउ गरेको थियो ।
