एभरेस्ट इन्टरनेसनल फिल्म फेस्टिभलमा नेपाली चलचित्र पुरस्कृत
काठमाडौँ। चीनद्वारा आयोजना गरिएको एभरेस्ट इन्टरनेसनल फिल्म फेस्टिभल चाइनामा अवार्ड विजेतालाई मङ्गलबार पुरस्कार प्रदान गरिएको छ । नेपाली चलचित्रको अन्तर्राष्ट्रिय प्रवर्धन तथा दुई देशबिचको सांस्कृतिक सम्बन्ध विस्तार गर्ने उद्देश्यले आयोजना गरिएको उक्त महोत्सवमा सहभागी २१ चलचित्रमध्ये छ चलचित्र अन्तिम प्रतिस्पर्धाका लागि छनोट भएका थिए ।
नोट भएका चलचित्रमध्ये विभिन्न विधाका उत्कृष्टलाई नगद पुरस्कारसहित सम्मान गरिएको हो । सो कार्यक्रममा ‘होस्टेल ३’ ले उत्कृष्ट सम्पादन विधामा अवार्ड जित्दै एक हजार अमेरिकी डलर नगद पुरस्कार प्राप्त गर्यो । त्यस्तै ‘महाजात्रा’ ले उत्कृष्ट छायाङ्कन विधामा एक हजार अमेरिकी डलर पुरस्कार राशि सहित पुरस्कृत भएको थियो । ‘कबड्डी ४’ बाट अभिनेतृ मेरुना मगरले उत्कृष्ट अभिनेतृ घोषित हुँदै एक हजार अमेरिकी डलर प्राप्त गर्नुभयो । ‘छक्का पन्जा’ बाट दीपकराज गिरी उत्कृष्ट अभिनेता घोषित हुनुभयो ।
यसै गरी ‘तेल भिसा’ का निर्देशक शङ्कर घिमिरेले उत्कृष्ट निर्देशकको अवार्डसहित दुई हजार अमेरिकी डलर नगद पुरस्कार प्राप्त गर्नुभयो । ‘अञ्जिला’ उत्कृष्ट फिचर फिल्म घोषित हुँदै चार हजार अमेरिकी डलर नगद पुरस्कार जित्न सफल भयो ।
