आइसको गोली प्रहारबाट ह्युस्टनमा मृत्यु भएका लोरेन्जो साल्गाडो अराउजो प्रति शोक व्यक्त गर्दै प्रदर्शन

टिम सुलिभान, ह्युस्टन, (एपी)। ती निर्माण व्यवसायी हरेक बिहान झिसमिसे उज्यालो हुनुभन्दा धेरै अघि उठ्थे, आफ्ना कामदारहरूलाई लिन घरबाट निस्कन्थे र त्यसपछि ह्युस्टनको विशाल क्षेत्रभित्र कतै अर्को घर बनाउने काममा लाग्थे।

चौध घण्टापछि, लोरेन्जो साल्गाडो अराउजो मेक्सिकोमा किशोरवयमा भेटिएकी आफ्नी श्रीमती र सहरको पूर्वी भागमा परिवारका लागि आफैंले बनाएको सामान्य घरमा फर्कन्थे।

उनका जेठा छोरा रोनाल्डो साल्गाडोका अनुसार, उनले दशकौंसम्म यही काम गरे। उनले बताएअनुसार उनका बुबाले ३५ वर्षको अवधिमा सयौं घरहरू बनाए, परिवारका लागि जीविकोपार्जनको व्यवस्था गरे र आफ्ना तीन छोराहरू कलेज गएको हेर्न पाए।

मंगलबार, ५२ वर्षीय साल्गाडो अराउजोलाई अमेरिकी अध्यागमन तथा भन्सार प्रवर्तन (आइस) का एक अधिकारीले गोली हानी हत्या गरे। संघीय एजेन्टहरूले चिनिने संकेत नभएका (सादा) गाडीहरूमा पछ्याउँदै गर्दा उनलाई गोली हानिएको थियो; उनी आफ्ना कामदारहरूलाई कामको नयाँ स्थानमा लैजाँदै थिए। यो गोलीकाण्डले ह्युस्टनका नेताहरूलाई आक्रोशित बनाएको छ र आइस तथा ट्रम्पको अध्यागमनसम्बन्धी कडा कारबाहीबारे सार्वजनिक चासो र आलोचनालाई पुनः बढाएको छ।

ह्युस्टन क्षेत्रको प्रतिनिधित्व गर्ने कंग्रेसका चार डेमोक्रेटिक सदस्यहरूले शनिबार आयोजित एक श्रद्धाञ्जली सभामा यस गोलीकाण्डको स्वतन्त्र छानबिनका लागि पहल गर्ने बताए।

“उनको रगत डोनाल्ड ट्रम्पको हातमा छ भन्ने कुरा हामी कहिल्यै बिर्सने छैनौं,” प्रतिनिधि क्रिस्टियन मेनेफीले भने। “हामी युद्धमा छैनौं। लोरेन्जो साल्गाडो अराउजो कुनै युद्धको हताहत थिएनन्। उनी एक मानव थिए जसको हत्या हाम्रो सरकारले गर्‍यो।”

साल्गाडो अराउजो आइसको कारबाहीको निसानामा थिएनन्

आइसका कार्यवाहक निर्देशकबाट प्राप्त जानकारी उद्धृत गर्दै गार्सियाले बताइन् कि संघीय एजेन्टहरू अर्कै कसैको खोजीमा थिए जब उनीहरूले साल्गाडो अराउजोको सेतो भ्यान रोक्ने प्रयास गरे। होमल्याण्ड सेक्युरिटी विभागले भनेको छ कि साल्गाडो अराउजो — जसलाई अधिकारीहरूले “अवैध आप्रवासी” भनेका छन् — ले आइसको गाडीलाई ठक्कर दिएपछि आत्मरक्षाका लागि आइसका एक अधिकारीले भ्यानमा गोली चलाएका थिए। उनीहरूले यसको कुनै प्रमाण भने उपलब्ध गराएका छैनन्।

साल्गाडो अराउजोले गाडी चलाइरहँदा उनीसँगै रहेका तीन जनाले बताएअनुसार उनलाई यात्रु बस्ने झ्यालबाट गोली हानिएको थियो र गोली चलाउने आइस अधिकारी भ्यानको अगाडि वा कुनै खतरामा थिएनन्; उनीहरूसँग कुरा गरेका एक वकिलले शुक्रबार यो जानकारी दिए।

उनको परिवारले पनि आइसको भनाइमा असहमति जनाएको छ। उनीहरूले बताएअनुसार, कामको अनुमति (वर्क परमिट) का लागि आवेदन दिन सहयोग गरिरहेका वकिलहरूले अध्यागमन अधिकारीहरूले रोकेको खण्डमा कस्तो व्यवहार गर्ने भन्नेबारे उनलाई जानकारी गराएका थिए। साल्गाडो अराउजोको हत्या हुँदा उनी कानुनी हैसियत प्राप्त गर्ने नजिक पुगिसकेका थिए।

“उनलाई के गर्ने भन्ने थाहा थियो,” रोनाल्डो साल्गाडोले यसै साता पत्रकारहरूलाई भने। “उनलाई कुनै पनि कागजातमा हस्ताक्षर नगर्ने कुरा थाहा थियो। उनलाई यो पनि थाहा थियो कि सबैभन्दा पहिले मलाई वा मेरी आमालाई फोन गर्नुपर्छ; ताकि हामी उनलाई त्यहाँबाट बाहिर निकाल्ने प्रक्रिया सुरु गर्न सकौं।”

उनलाई लाग्छ कि उनका बुबालाई कसैले पहिचान नखुलेका सवारी साधनहरूमा पछ्याइरहेको छ वा कसैले आफ्नो भ्यान वा काम गर्ने औजारहरू चोर्ने योजना बनाउँदैछ भन्ने डर लागेको हुनुपर्छ।

हिस्पानिक समुदायको बाहुल्यता रहेको यस क्षेत्रमा भएको गोलीकाण्ड ट्रम्प प्रशासनको आप्रवासनसम्बन्धी कानुन कार्यान्वयन अभियानका क्रममा भएको कम्तीमा आठौं मृत्युको घटना हो।

एक दयालु र परिवारप्रति समर्पित पति तथा बुबा

साल्गाडो अराउजो ३० वर्षभन्दा बढी समयअघि अमेरिका आएका थिए र ह्युस्टनमा आफ्नी श्रीमतीसँग बसोबास गर्दै तीन छोराछोरीलाई हुर्काएका थिए।

घरमा शिक्षालाई सधैं प्राथमिकता दिइन्थ्यो, रोनाल्डो साल्गाडोले भने, जो अहिले शिक्षक छन्। उनका एक भाइ इन्जिनियर छन् भने अर्का भाइ कलेजमा इन्जिनियरिङ पढिरहेका छन्।

साल्गाडोका बाल्यकालका धेरै साथीहरूले उनका बुबा दयालु र मृदुभाषी स्वभावका थिए भनी सम्झिए; उनी कामबाट फर्केपछि सधैं आफ्नी श्रीमतीको दिन कस्तो रह्यो र छोराहरूका साथीहरूको हालखबर के छ भनेर सोध्ने गर्थे।

“हामीले उनलाई दिनको अन्त्यमा बेलुकाको खाना खान घर फर्किंदा मात्र देख्थ्यौं, तर यसले उनी कति कडा परिश्रम गर्ने व्यक्ति थिए भन्ने देखाउँछ,” छिमेकी जेसिका एलानिस मग्डालेनोले भनिन्। “अहिले उनीहरूसँग जे जति छ, त्यो त्यही समर्पणको नतिजा हो।”

हाई स्कूलको पहिलो वर्षदेखि नै रोनाल्डो साल्गाडोका साथी रहेका जोसु फ्लोरेसले आफूले लोरेन्जो साल्गाडो अराउजोलाई पहिलो पटक उनका छोराको फुटबल खेलमा देखेको बताए।

“मलाई लाग्छ यसले उनी कस्ता व्यक्ति थिए भन्ने कुरा प्रस्ट पार्छ,” फ्लोरेसले भने। उनले साल्गाडो अराउजो कामको लामो र कठिन दिनपछि पनि छोराको खेल हेर्न उपस्थित हुने गरेको कुरा सम्झिए।

साल्गाडो अराउजोकी श्रीमती “अत्यन्तै मर्माहत” छिन् भनी एक आफन्तले बताए।

“उनी निकै विचलित छिन्… आक्रोशित, दुःखी र अन्योलग्रस्त अवस्थामा छिन्,” मेक्सिकोमा बस्ने उनका भतिजा जोसे टोरेस रामोनले ‘एसोसिएटेड प्रेस’ लाई फेसबुक सन्देशमार्फत बताए।

शनिबार आयोजित श्रद्धाञ्जली सभामा उनका जेठा छोरा रोनाल्ड साल्गाडोले आफूले आफ्ना बुबालाई गर्व महसुस गराउन सकिरहेको आशा व्यक्त गरे।

“म उहाँका लागि संघर्ष गरिरहनेछु,” उनले भने।

उनका भाइ लोरेन्जो साल्गाडो जुनियरले आफ्ना बुबामाथि भएको गोली प्रहारको घटनालाई “अमेरिकी हुनुको पीडादायी क्षण” भनेर वर्णन गरे।

“मेरो सरकार—मेरो संघीय सरकारले नै मेरा बुबालाई खोसे पनि—हामी जनताले न्याय दिलाउनेछौं,” उनले भने। “हामी जनता नै अमेरिका हौं।”

साल्गाडो अराउजो साँझ घर फर्किएपछि घरको बरण्डामा बसेर संगीत सुन्न र घरपालुवा कुकुरलाई मुसार्न मन पराउँथे। उनका परिवारले उनलाई नियमित दिनचर्या पालना गर्ने एक सरल व्यक्तिको रूपमा वर्णन गरेका छन्।

“उनी मृत्युको हकदार थिएनन्,” रोनाल्डो साल्गाडोले भने। “उनले अमेरिकामा आफ्नो परिवारलाई ‘अमेरिकन ड्रिम’ (समृद्ध र सुखी जीवन) दिलाउन आफ्नो जीवन समर्पित गरेका थिए।”