सम्पत्ति शुद्धीकरण मुद्दामा विष्णुप्रसाद पौडेललाई सात दिन म्याद थप

काठमाडौँ। सम्पत्ति शुद्धीकरण (मनि लाउन्डरिङ) मुद्दाको अनुसन्धानका क्रममा पक्राउ पर्नुभएका एमाले उपाध्यक्ष विष्णुप्रसाद पौडेललाई थप सात दिन हिरासतमा राख्न विशेष अदालतले अनुमति दिएको छ।

सम्पत्ति शुद्धीकरण अनुसन्धान विभागबाट जरुरी पक्राउ पुर्जी स्वीकृति एवं अनुसन्धान प्रयोजनका लागि म्याद थपका लागि अनुरोध भई आएकामा विशेष अदालतले मङ्गलवार (असार ९ गते) पहिलो पटक सात दिनको म्याद थप गरेको हो।

विशेष अदालतका न्यायाधीश नारायणप्रसाद पौडेल, हेमन्त रावल र उमेश कोइरालाको इजलासबाट उक्त म्याद थप गरिएको विशेष अदालत प्रशासन शाखाद्वारा जारी सूचनामा उल्लेख छ। अदालतको आदेशबमोजिम पौडेललाई न्यायिक हिरासतमा पठाइएको छ।