कम्बोडियाका स्क्यामिङ सेन्टरबाट थप सात नेपालीको उद्धार
बैंकक। कम्बोडियाका विभिन्न अनलाइन स्क्यामिङ केन्द्र तथा क्यासिनोहरूमा गैरकानुनी काममा लगाइएका थप सात जना नेपाली नागरिकहरूको उद्धार गरिएको छ ।
बैंककस्थित नेपाली राजदूतावासको पहल र कम्बोडिया सरकारको सहयोगमा उद्धार गरिएका उनीहरू सोमबार काठमाडौँ आइपुगेका हुन्। यसअघि पनि कम्बोडियाबाट दर्जनौँ नेपालीको उद्धार भइसकेको छ ।
विभिन्न व्यक्तिको प्रलोभनमा परी कम्बोडिया पुगेका उनीहरूलाई त्यहाँका अवैध केन्द्रहरूमा अनलाइन ठगी लगायतका गैरकानुनी काममा लगाउने गरिएको पाइएको छ। कतिपय नेपालीहरू भिसा अवधि सकिएर अलपत्र परेको र कम्पनीहरूले राहदानी समेत जफत गरिदिँदा समस्यामा परेको दूतावासले जनाएको छ। राहदानी हराएका वा जफत भएका नेपालीहरूका लागि दूतावासले निःशुल्क एकतर्फी यात्रा अनुमतिपत्र (ट्राभल पर्मिट) जारी गरी स्वदेश फिर्तीमा सहजीकरण गरिरहेको छ ।
पछिल्लो समय कम्बोडिया जाने नेपालीको सङ्ख्यामा उल्लेख्य वृद्धि भएको दूतावासको तथ्याङ्कले देखाएको छ । सन् २०२१ मा जम्मा १०१ जना नेपाली कम्बोडिया गएकोमा सन् २०२५ मा यो संख्या बढेर ९,६७६ पुगेको छ ।
यसरी भिजिट भिसामा गएर अलपत्र पर्ने र ठगीमा पर्ने क्रम बढेपछि दूतावासले छिटो र धेरै पैसा कमाउने लोभमा परेर कम्बोडिया, लाओस, म्यानमार र थाइल्याण्ड जस्ता मुलुकमा भ्रमणको बहानामा रोजगारीका लागि नजान सचेत गराएको छ।
