अन्तरघातको आरोपमा नवलपरासी कांग्रेसका ४३ नेतामाथि कारबाही सिफारिस
नवलपरासी । प्रतिनिधिसभा निर्वाचनमा पार्टीका उम्मेदवारहरू भारी मतान्तरले पराजित भएपछि नेपाली कांग्रेस नवलपरासी (पश्चिम) ले ४३ जना जिल्ला नेतामाथि कारबाहीको सिफारिस गरेको छ।
जिल्ला कार्यसमितिले पार्टीभित्रै अन्तरघात भएको निष्कर्ष निकाल्दै ती नेताहरूलाई निष्कासन गर्न केन्द्रीय सभापतिलाई पत्राचार गरेको हो। कांग्रेसका जिल्ला सभापति अर्जुन पोखरेलले केन्द्रीय सभापति गगन थापालाई पत्र पठाउँदै कारबाहीको माग गर्नुभएको छ।
नवलपरासी पश्चिम क्षेत्र नम्बर १ मा कांग्रेसका उम्मेदवार विनोदकुमार चौधरी रास्वपाका उम्मेदवार विक्रम खनालसँग करिब ३६ हजार मतान्तरले पराजित हुनुभएकाे थियाे। यस्तै, क्षेत्र नम्बर २ मा कांग्रेसका भरत थापा रास्वपाका नरेन्द्र गुप्तासँग भारी मतान्तरले पराजित हुनुभएकाे थियाे।
दुवै क्षेत्रमा भएको अप्रत्याशित पराजयको कारण पार्टीभित्रका केही जिम्मेवार नेताहरूको अन्तरघात रहेको ठहर जिल्ला कार्यसमितिले गरेको छ। सोही आधारमा जिल्ला अनुशासन समितिले तयार पारेको प्रतिवेदनलाई कार्यसमितिको बैठकले अनुमोदन गरी थप कारबाहीका लागि केन्द्रमा सिफारिस गरिएको हो।
कारबाही सिफारिसमा पूर्व गृहराज्यमन्त्री देवेन्द्रराज कँडेल, लुम्बिनी प्रदेशका वनमन्त्री देबकरण प्रसाद जयसवाल, महासमिति सदस्यहरू, क्षेत्रीय तथा वडा तहका पदाधिकारीसमेत पर्नुभएकाे हाे ।
यसअघि पनि निर्वाचनकै दिन २२ जना नेतामाथि कारबाही गरिएको थियो भने केही नेता तथा कार्यकर्ताले निर्वाचनअघि नै पार्टी परित्याग गर्नुभएकाे थियाे । रास्वपामा प्रवेश गरेका नेता विक्रम खनालको प्रभावपछि जिल्लामा कांग्रेसभित्र आन्तरिक असन्तुष्टि बढेको बताइएको छ।
