तीन हजार चार सय छ उम्मेदवारको वैयक्तिक विवरण सार्वजनिक
काठमाडौँ । निर्वाचन आयोगले उम्मेदवारको वैयक्तिक विवरण सार्वजनिक गरेको छ । निर्वाचन आयोगले प्रतिनिधि सभा सदस्य निर्वाचनका लागि उम्मेदवारी दिएका र निर्वाचन चिह्न प्रदान गरेका तीन हजार चार सय छ जनाको विवरण सार्वजनिक गरेको छ ।
जसमा तीन हजार १७ पुरुष, ३८८ महिला र अन्य एक जना छन् । आयोगले उम्मेदवारको वैयत्तिक विवरण सार्वजनिक गर्दै यो विवरण सार्वजनिक गरेको जनाएको छ । आयोगका प्रबक्ता नारायणप्रसाद भट्टराईका अनुसार २५ देखि ४० वर्ष उमेर समूहका एक हजार ५६ जना, ४१ देखि ६० वर्ष उमेर समूहका एक हजार ९२५ र ६१ वर्षमाथिका ४२५ जना उम्मेदवार छन् ।
प्रतिनिधिसभा सदस्य निर्वाचन निर्देशिका, २०८२ को दफा २२ ९१०, अनुसूची–१० बमोजिम उम्मेदवारले मनोनयन पत्रसँगै पेस गरेको वैयक्तिक विवरण सोही दफाको उपदफा (३) अनुसार सार्वजनिक गरिएको आयोगका प्रवक्ता नारायणप्रसाद भट्टराईले जानकारी दिनुभयो ।
निर्वाचन प्रक्रियालाई पारदर्शी, निष्पक्ष तथा विश्वसनीय बनाउन उम्मेदवारका वैयक्तिक विवरणहरू सार्वजनिक गर्नु आवश्यक रहेको भन्दै आयोगले कानुनी व्यवस्थाअनुसार सम्बन्धित सबै उम्मेदवारका विवरण आफ्नो आधिकारिक ‘वेबसाइट’मार्फत प्रकाशन गरेको उहाँले बताउनुभयो ।
यसले मतदाता, सरोकार भएका निकाय, सञ्चारमाध्यम तथा आमनागरिकलाई उम्मेदवारसम्बन्धी आवश्यक जानकारी प्राप्त गर्न सहज बनाउने विश्वास गरिएको छ।
उम्मेदवारको वैयक्तिक विवरण आयोगको ‘वेबसाइट’ मा हेर्न सकिने आयोगले जनाएको छ ।
