मुख्यमन्त्री बानियाँले २७ गते विश्वासको मत लिने
मकवानपुर । बागमती प्रदेशका मुख्यमन्त्री इन्द्रबहादुर बानियाँले साउन २७ गते प्रदेशसभाबाट विश्वासको मत लिने तयारी गर्नुभएको छ । एमाले–कांग्रेस गठबन्धनको समर्थनमा साउन २० गते मुख्यमन्त्री बन्नुभएका बानियाँले संवैधानिक प्रक्रियाअनुसार निर्धारित समयमा विश्वासको मत लिने निर्णय गर्नुभएको हो ।
संविधानको धारा १६८ को उपधारा ४ तथा प्रदेश सभा नियमावली २०७४ को नियम १४३ को उपनियम (१) बमोजिम नियुक्त मुख्यमन्त्रीले ३० दिनभित्र विश्वासको मत लिनुपर्ने प्रावधान रहेको छ ।
बानियाँले संसद सचिवालयमा साउन २७ गतेका लागि प्रदेशसभा बैठक बोलाउने जानकारी गराइसक्नुभएको छ । सभामुख भुवनकुमार पाठकलाई पनि विश्वासको मत लिने प्रस्तावबारे जानकारी दिइसकिएको छ ।
सभामुखका अनुसार बैठकको मिति टुङ्गो लागे पनि औपचारिक पत्र प्राप्त हुन बाँकी रहेकाले त्यसपछि समय तोकिनेछ । सत्तारूढ गठबन्धनमा रहेको नेपाली कांग्रेसका ३७ र एमालेका २७ सांसदको समर्थनमा बानियाँ मुख्यमन्त्री बन्नुभएको छ । हालसम्म उहाँले एक विना विभागीय मन्त्रीसहित कांग्रेसका २ र एमालेका ६ मन्त्रीलाई मन्त्रिपरिषदमा सहभागी गराइसक्नुभएको छ ।
१४ मन्त्रालय रहेको बागमती प्रदेशमा गठबन्धनबीचको सहमतिअनुसार कांग्रेसले मुख्यमन्त्रीसहित ८ मन्त्रालय र एमालेले ६ मन्त्रालय पाउने सहमति भएको छ ।
