मिटर ब्याजसँग सम्बन्धित फर्जी लिखित अवैध घोषणा गर्ने सरकारको निर्णय
काठमाडौँ । सरकारले मिटर ब्याजसँग सम्बन्धित फर्जी लिखितहरू आजैको मितिदेखि अवैध घोषणा गर्ने निर्णय गरेको छ ।
मन्त्रिपरिषद् आजको बैठकपछि सरकारका प्रवक्ता एवम् शिक्षा तथा खेलकुद मन्त्री सस्मित पोखरेलले मिटर ब्याजबाट प्रभावित नागरिकको माग सम्बोधन गर्ने सम्बन्धमा गठित समिति र मिटरब्याज विरुद्ध किसान मजदुर आन्दोलनका प्रतिनिधिबीच भएको सम्झौता अनुमोदन गर्ने निर्णय भएको जानकारी दिनुभयो ।
यसैगरी मन्त्रिपरिषद् बैठकले गणेश नेपाली आत्मदाह घटनाको सत्यतथ्य छानबिन गर्न उच्च अदालतका पूर्व न्यायाधीश केशवप्रसाद बास्तोलाको संयोजकत्वमा न्यायिक समिति गठन गर्ने निर्णय गरेको जानकारी सरकारका प्रवक्ता एवम् मन्त्री पोखरेलले दिनुभयो ।
मन्त्री पोखरेलले २०८५ साल भदौ मसान्तसम्म पोखरा र गौतम बुद्ध अन्तर्राष्ट्रिय विमानस्थलबाट हुने नियमित अन्तर्राष्ट्रिय उडानका लागि पार्किङ, ल्याण्डिङ र न्याभिगेसन शुल्कमा पूर्ण छुट तथा ग्राउण्ड ह्याण्डलिङ शुल्कमा ५० प्रतिशत छुट दिने निर्णय भएको जानकारी दिनुभयो ।
मन्त्रिपरिषद् बैठकले आर्थिक ऐन २०८३ को दफा १८ को उपदफा १ बमोजिम शिक्षा समता शुल्क र स्वास्थ्य समता शुल्क पूर्ण रूपमा मिनाहा गर्ने निर्णय गरेको पनि मन्त्री पोखरेलले बताउनुभयो ।
मन्त्री पोखरेलले विशेष अदालतको अध्यक्ष पदमा उच्च अदालत तुलसीपुरका न्यायाधीश वासुदेव आचार्यलाई तोक्ने तथा श्रम अदालतको अध्यक्ष पदमा उच्च अदालत सुर्खेतका माननीय न्यायाधीश दीपेन्द्र अधिकारीलाई तोक्ने निर्णय भएको जानकारी दिनुभयो ।
यस्तै बैठकले गुठी संस्थानको प्रशासक पदमा शैलेशराज कुँवरलाई नियुक्त गर्ने निर्णय गरेको मन्त्री पोखरेलले बताउनुभयो ।
