बङ्गलादेशसँग दोस्रो हारसँगै नेपालको उपाधि यात्रा समाप्त
काठमाडौँ। बङ्गलादेशसँग लगातार दोस्रो हार खेपेसँगै भुटानमा जारी साफ साफ यु–१७ महिला च्याम्पियनसिपमा नेपालको उपाधि सम्भावना सकिएको छ ।
भुटानको थिम्पुस्थित चाङ्लिमिथाङ रङ्गशालामा बुधबार भएको खेलमा नेपाल बङ्गलादेशसँग ४–१ गोलले पराजित भयो । नेपाल यस अघिल्लो खेलमा बङ्गलादेशसँग ३–० गोलले पराजित भएको थियो ।
नेपालले आफ्नो पहिलो खेलमा भारतसँग ७–० गोलले पराजित भएको थियो। नेपालले अर्को खेलमा आयोजक भुटानलाई भने २–१ गोलले हराएको थियो ।
एकपक्षीय खेलमा पहिलो हाफमा २–१ गोलले पछि परेको नेपालले दोस्रो हाफमा थप दुई गोल खाएको थियो । बङ्गलादेशलाई जिताउन सौरभी अखण्ड प्रीतिले ह्याट्रिक गर्नुभयो । अर्को गोल थुनुए मार्माले थप्नुभयो । नेपालका लागि कप्तान भूमिका बुढाथोकीको गोल सान्त्वना बन्यो ।
जितसँगै चार खेलबाट नौ अङ्क बनाएको बङ्गलादेश दोस्रो स्थानमा छ । नेपालले समान खेलबाट तीन अङ्क बनाएको छ । उपाधि होड कायम राख्न बङ्गलादेशलाई हराउनै पर्ने खेलमा लज्जासपद हार खेपेपछि नेपालको सम्भावना सकिएको हो ।
च्याम्पियनसिपमा आयोजक भुटानसहित नेपाल, भुटान र बङ्गलादेशको सहभागिता रहेको छ । एक अर्कासँग दुई दुई खेल खेलेपछि शीर्षस्थानमा रहने टोली च्याम्पियन बन्ने छ ।
च्याम्पियनसिपमा नेपालले अब अर्को खेल भारतसँग अगस्ट २९ र भुटानसँग ३१ तारिख खेल्ने छ ।
