मैले प्रममा कार्कीलाई सिफारिस गरेको होइन : एमाले अध्यक्ष ओली
काठमाडौँ । नेकपा एमालेका अध्यक्ष केपी शर्मा ओलीले जेनजीको शान्तिपूर्ण प्रदर्शनलाई धोकामा पारेर विध्वंसतर्फ धकेलिएको बताउनुभएको छ ।
काठमाडौँमा आज सम्पादकहरूसँगको छलफलमा अध्यक्ष ओलीले जेनजी आन्दोलनलाई आफूले तीन पाटोमा हेरेको भन्नुहुँदै भ्रष्टाचार अन्त्य, सुशासन र सामाजिक सञ्जाल खुलाको मागसहित भएको जेनजी प्रदर्शनलाई धोकामा पारेर आगजनी, लुटपाट र तोडफोडतर्फ धकेलिएको टिप्पणी गर्नुभयो ।
भदौ २३ गतेको जेनजी प्रदर्शन शान्तिपूर्ण हुने आफूलाई ब्रिफिङ भएको उल्लेख गर्नुहुँदै अध्यक्ष ओलीले निषेधित क्षेत्रबाट वास्तविक जेनजी प्रदर्शनकारी फर्किए पनि केही अराजक तत्त्वहरू योजनाबद्ध रुपमा अन्तर्राष्ट्रिय सम्मेलन केन्द्रतर्फ अघि बढ्दा भीड रोक्ने पर्याप्त तयारी नपुगेको स्वीकार गर्नुभयो ।
सम्पादकहरूको प्रश्नको जवाफ दिनुहुँदै अध्यक्ष ओलीले जेनजीको मागमा आफूले कुनै विरोध नगरेको र विद्यार्थीको आन्दोलनमा गोली चलेको सुनेपछि गृहमन्त्रीलाई सोध्दा रबर गोली हानिएको भन्ने जवाफ पाएको पनि जिकिर गर्नुभयो ।
अध्यक्ष ओलीले ओलीले आफूले सुशीला कार्कीलाई प्रधानमन्त्रीमा सिफारिस गरेको भन्ने प्रचार गलत रहेको भन्नुहुँदै सेनाको सुरक्षामा रहँदा राष्ट्रपतिलाई निकासका लागि आवश्यक कदम चाल्न भने सिफारिस गरेको बताउनुभयो ।
