अनसनरत डा.केसी र सरकारी टोलीबीच वार्ता जारी
धनगढी । चिकित्सा शिक्षा सुधारका माग गर्दै अनसनरत डा.गोविन्द केसी र सरकारी टोलीबीच वार्ता जारी छ ।
मध्यान्ह साढे १२ बजेदेखि शुरु भएको वार्ता अहिले पनि जारी छ ।
सेती प्रादेशिक अस्पतालको प्रशासनिक भवनमा सरकारी टोली र डा.केसी पक्षविच वार्ता भइरहेको छ । दुई पक्षीय वार्तामा डा.केसीका मागबारे छलफल केन्द्रित रहेको छ ।
तीन दिनदेखिको अनसनले स्वास्थ्य कमजोर देखिएपछि डा.केसीलाई सेती प्रादेशिक अस्पतालको आइसियुमा राखेर उपचार भइरहेको छ ।
धनगढीको श्रीकृष्ण मन्दिर धर्मशालामा साउन ७ गते अनसन शुरु गरेका डा.केसीलाई स्वास्थ्य अवस्था कमजोर देखिएपछि शनिवार अस्पताल भर्ना गरिएको थियो ।
वार्तामा सांसद पुकार बम, प्रधानमन्त्रीका स्वास्थ्य सल्लाहकार जेपी अग्रवाल, स्वास्थ्य तथा खाद्य स्वच्छता मन्त्रालयका सचिव डा.विकास देवकोटा, शिक्षा तथा खेलकुद मन्त्रालयका सचिव चूडामणि पौडेल र डा.केसीको तर्फबाट डा.अमृत जैशी, पवन थापा सहभागी हुनुहुन्छ ।
