जेन्जी आन्दोलनका घाइतेहरूलाई तत्काल १५ हजार रुपैयाँका दरले राहत उपलब्ध गराउने सरकारको निर्णय
काठमाडौँ । सरकारले भदौ २३ र २४ गतेको आन्दोलनका घाइतेका लागि तत्कालका लागि १५ हजार रुपैयाँका दरले राहत उपलब्ध गराउने निर्णय गरेको छ ।
प्रधानमन्त्री तथा मन्त्रिपरिषद्को कार्यालय सिंहदरबारमा आज बसेको मन्त्रिपरिषद् बैठकले आन्दोलनका २ हजार ४ सय २९ जनालाई तत्कालका लागि प्रतिव्यक्ति १५ हजार रुपैयाँ राहत रकम उपलब्ध गराउने निर्णय गरेको सरकारका प्रवक्ता एवं सञ्चार तथा सूचना प्रविधि मन्त्री जगदिश खरेलले जानकारी दिनुभयो ।
यस्तै बैठकले नेपाल विशेष सेवा ऐन २०४२ लाई संशोधन गर्न बनेको अध्यादेश जारी गर्न राष्ट्रपति समक्ष सिफारिस गर्ने तथा नेपाल स्टक एक्सचेन्ज लिमिटेड नेप्सेको पुनः संरचनाका लागि सुझाव दिन प्रकाशजंघ केसीको नेतृत्वमा सुझाव समिति गठन गर्ने निर्णय गरेको मन्त्री खरेलले बताउनुभयो ।
मन्त्रिपरिषद् बैठकले माथिल्लो मुस्ताङ क्षेत्रमा पदयात्रामा जाने विदेशी नागरिकको पदयात्रा अनुमति दस्तुर प्रतिदिन प्रतिव्यक्ति ५० अमेरिकी डलर कायम हुनेगरी अध्यागमन नियमावली २०५१ को अनुसूची १२ को हेरफेर गर्ने निर्णय गरेको छ ।
यस्तै बैठकले प्रदेश तथा स्थानीय शासन सहयोग कार्यक्रमका लागि नर्वे सरकारबाट प्राप्त हुने करिब ५ मिलियन अमेरिकी डलर र स्वीट्जरल्यान्ड सरकारबाट प्राप्त हुने करिब २ दशमलव १ मिलियन अमेरिकी डलर थप अनुदान सहायता स्वीकार गर्ने, शहिद धर्मभक्त माथेमा मानव अङ्ग प्रत्यारोपण केन्द्रको कार्यकारी निर्देशक पदमा डा. कल्पना कुमारी श्रेष्ठलाई तोक्ने लगायतका निर्णयहरू गरेको मन्त्री जगदिश खरेलले जानकारी दिनुभयो ।
