कविता
साकुराको फेदमुनि
मनभरि साकुरा फुलिरहेछ !
यसपालिको वसन्तमा पनि मानौँ
आफैँलाई थाहा नदिएर
सडकका दुवै छेउमा ठिङ्ग सिपाही झैँ
उभिएको यो सडकबत्ती
मानौँ !
कुनै गोरिल्ला समयको पर्खाइमा छ ।
झरना झैँ झर्नुको मजा बारम्बार
कुनै बँैसालु युवतीले चेस्टरमा घुसारेको खुद्रा पैसा जस्तै छ
उनका लाजका वसन्त !
नग्नताको पारदर्शी पर्दा हेरेर हस्तमैथुनमा
बारम्बार सपना देखिरहेको नयाँ सडक
झन्डा बेचिरहेकी अधबैँसे आइमाईको आँखामा
पोखिएको भोक र देशको दन्त्यकथा !
कुनै नाबालिग केटाले एक सर्को चुरोटको
धुवाँमा फुलेको साकुरा
युग अलमलमा छ ।
हरेक वसन्तमा त्यसरी नै फुलिरहेछ साकुरा
जसरी फुल्छ बारम्बार हरेक मान्छेको आँखामा
एउटा अपाहिज खुसी
बैसाखी टेकेर चढ्न आतुर छ
शिखर
डोकोमा टिपेर ल्याएको साकुरा
सपना झैँ बेचिन्छ सस्तो दाममा हाटबजारमा
तपाईं पनि किन्नुहुन्छ महोदय ?
मेरो बिक्न नसकेको सपना र साकुरा ?
