ट्रंप प्रशासनद्वारा २ लाख विदेशीहरूलाई लक्षित गरी सामूहिक भिसा खारेजीको तयारीमा

वाशिंगटन। ट्रम्प प्रशासनले संयुक्त राज्य अमेरिकामा शरणको लागि आवेदन दिएका वा हाल शरणको खोजी गरिरहेका २ लाखसम्म विदेशी नागरिकहरूको व्यापार तथा पर्यटन भिसा रद्ध गर्ने तयारी गरिरहेको छ। यदि यसो भएमा, यो कदम अमेरिकी इतिहासमै भिसा रद्ध गर्ने सबैभन्दा ठूलो सामूहिक कार्य हुनेछ र यसले कानुनी चुनौतीहरूको सामना गर्नुपर्ने सम्भावना छ।

विदेश मन्त्रालयका कागजातहरू र दुई अमेरिकी अधिकारीहरूका अनुसार, यदि कुनै चुनौती वा संशोधन नभएमा, मन्त्रालयले आगामी केही हप्ताभित्र सन् २०१६ देखि २०२६ को बीचमा जारी गरिएका ‘बी-१’ र ‘बी-२’ भिसाहरू रद्ध गर्ने घोषणा गर्ने अपेक्षा गरिएको छ; यी भिसावाहकहरूले शरणको लागि आवेदन दिएका वा हाल शरण खोजिरहेका छन्। यो कदम ‘डिपार्टमेन्ट अफ होमल्यान्ड सेक्युरिटी’ (डिएचए) सँगको समन्वयमा चालिनेछ।

विदेश मन्त्रालयका प्रवक्ता टमी पिगोटले भने, “हामी डिएचएससँग समन्वय गर्दै ती विदेशीहरूको ‘नन-इमिग्रेन्ट’ (गैर-आप्रवासी) भिसा पहिचान गरी रद्ध गर्दैछौं, जो छोटो अवधिको आगन्तुक भनी अमेरिका आएका थिए तर पछि यहाँ स्थायी रूपमा बस्नका लागि शरणको आवेदन दिए।”

उनले रद्ध हुन सक्ने भिसाको संख्याबारे टिप्पणी गर्न अस्वीकार गर्दै भने, “प्रक्रिया जारी रहने भएकाले रद्ध गरिने भिसाको संख्या परिवर्तनशील रहनेछ र यो निरन्तर रूपमा (रोलिङ आधारमा) गरिनेछ।”

अधिकारीहरूका अनुसार, भिसा रद्ध हुँदैमा उनीहरूलाई तत्काल देश निकाला गरिनेछ भन्ने छैन। हाल शरणसम्बन्धी मुद्दा विचाराधीन रहेका अधिकांश व्यक्तिहरूको श्रेणी परिवर्तन गरिनेछ तर उनीहरूले व्यापार वा पर्यटन यात्रीको रूपमा रहेको आफ्नो दर्जा गुमाउनेछन्। भिसा रद्ध गर्ने निर्णय अन्तिम भइनसकेकाले नाम नबताउने सर्तमा बोल्ने अधिकारीहरूले यस्तो जानकारी दिएका हुन्।

गत वर्ष राष्ट्रपति डोनाल्ड ट्रम्पले आफ्नो दोस्रो कार्यकाल सम्हालेयता, उनको प्रशासनले भिसा आवेदकहरूमाथि निरन्तर रूपमा कडाइ बढाउँदै लगेको छ—जसमा उनीहरूको सामाजिक सञ्जालको इतिहासबारे थप जानकारी माग्ने, भिसा प्रक्रियाका लागि महँगो ‘बन्ड’ (धरौटी) राख्न लगाउने र निश्चित देशका नागरिकहरूलाई भिसा जारी गर्न पूर्ण रूपमा रोक लगाउने जस्ता कदमहरू समावेश छन्।

सोमबार सामाजिक सञ्जालमा गरिएको एक पोस्टमा, उप-विदेश मन्त्री क्रिस्टोफर ल्यान्डौले पर्यटक तथा व्यापारिक भिसा प्रयोग गरी अमेरिका प्रवेश गर्ने र त्यसपछि शरणका लागि आवेदन दिने व्यक्तिहरूको आलोचना गरे।

“अमेरिका र विश्वभरका मानिसहरू नक्कली शरणका दाबीहरूबाट आजित भइसकेका छन्,” ल्यान्डौले ‘एक्स’मा लेखे। “शरणको व्यवस्था अध्यागमन कानुन छल्ने माध्यम वा छिद्र बन्नु हुँदैन।” ल्यान्डौले सन् २०१५ मा पर्यटक भिसामा अमेरिका आएर पछि शरणका लागि आवेदन दिएका एक कोलम्बियाली नागरिकको उदाहरण पनि प्रस्तुत गरे।

सामान्यतया, बि १ भिसा व्यापारिक भ्रमणका लागि र बि २ भिसा पर्यटन, पारिवारिक भेटघाट वा उपचारका लागि जारी गरिन्छन्। कागजात वा अधिकारीहरूबाट यो कुरा तत्काल स्पष्ट हुन सकेन कि यी भिसा वाहकहरूमध्ये कति जनाले अमेरिकामा शरण खोजिरहेका छन् वा खोजिसकेका छन् र भिसा खारेजीबाट कति जना प्रभावित हुनेछन्।

हाल बि १ र बि २ भिसाका लागि आवेदन दिनेहरूलाई उनीहरूले अमेरिकामा शरणका लागि आवेदन नदिने कुराको प्रतिबद्धता जनाउन र आफूहरू आफ्नो देश फर्कने योजनामा ​​रहेको कुरा प्रमाणित गर्न भनिन्छ।

विगत १८ महिनामा, विदेश मन्त्रालयले मादक पदार्थ सेवन गरी सवारी चलाउनेदेखि लिएर बलात्कार र लुटपाटजस्ता अपराधमा दोषी ठहरिएका वा आरोपित व्यक्तिहरू, साथै विशेष गरी मध्य पूर्वमा अमेरिकी नीतिहरूको सार्वजनिक रूपमा विरोध गर्ने व्यक्तिहरूको करिब १ लाख ७५ हजार भिसा खारेज गरेको छ।

प्रशासनले तथाकथित ‘बर्थ टुरिजम’ (जन्मका लागि गरिने भ्रमण) विरुद्ध कडा कदम चाल्ने प्रक्रिया अघि बढाएको छ। प्रशासनको दाबी अनुसार, विदेशी गर्भवती महिलाहरूले आफ्ना सन्तानले जन्मसिद्ध नागरिकताको सुविधा प्राप्त गरून् भन्ने उद्देश्यले अमेरिका आएर बच्चा जन्माउने अभ्यास नै ‘बर्थ टुरिजम’ हो। ट्रम्पले जन्मसिद्ध नागरिकताको व्यवस्था अन्त्य गर्ने प्रयास पटक-पटक गरेका छन्, तर सर्वोच्च अदालतलगायतका अदालतहरूले उनका ती प्रयासहरूलाई अस्वीकार गरेका छन्।

विदेश मन्त्रालयका कागजातहरूले देखाएअनुसार, ‘सिटिजन एन्ड इमिग्रेसन सर्भिस’ (नागरिकता तथा अध्यागमन सेवा) बाट शरणसम्बन्धी निवेदनहरूबारे जानकारी प्राप्त भएपछि हाल बि १ र बि २ भिसावाहकहरूको जाँच-पड्ताल सुरु गरिएको हो।