सागर गैरेको ‘एउटा अल्बाट्रस : प्रशान्त महासागरदेखि काला सागरसम्म’ लोकार्पण

काठमाडौँ। साहित्य, यात्रा र संस्कृतिको अन्तर्सम्बन्धलाई उजागर गर्ने नियात्रा कृति ‘एउटा अल्बाट्रस : प्रशान्त महासागरदेखि काला सागरसम्म’ लोकार्पण गरिएको छ।

कार्यक्रममा पुस्तकका लेखक सागर गैरेले आफूले विभिन्न देशको भ्रमणका क्रममा देखेका समाज, संस्कृति, इतिहास, प्रकृति र मानवीय अनुभूतिहरूलाई नियात्राको स्वरूपमा पुस्तकमा प्रस्तुत गरेको बताउनुभयो । उहाँले यात्रा भनेको भौगोलिक दूरीलाई पार गर्नु मात्र नभएर आत्मअन्वेषण, संस्कृतिको अध्ययन र विश्वलाई बुझ्ने माध्यम भएको उल्लेख गर्नुभयो ।

कोहलपुरमा बसेर लामो समयदेखि साहित्य साधनामा सक्रिय गैरेको यो कृतिमा मलेसिया, भियतनाम, भारतको गोवा, फिलिपिन्स र जर्जिया भ्रमणका अनुभवहरू समेटिएका छन्। पुस्तकमा प्रशान्त महासागरका किनारादेखि युरोप–एसियाको सङ्गम क्षेत्र मानिने काला सागर आसपासका भूभागसम्मको यात्रालाई लेखकले संवेदनशील र कलात्मक ढङ्गले प्रस्तुत गर्नुभएको छ ।

नियात्राकार युवराज नयाँघरेले पुस्तकले नेपाली नियात्रा साहित्यमा नयाँ ऊर्जा थपेको बताउनुभयो । उहाँले पुस्तक पढ्दा लेखकको दृष्टि पर्यटकको भन्दा फरक रहेको उल्लेख गर्दै यात्राको क्रममा भेटिएका दृश्यलाई सामाजिक र सांस्कृतिक चेतनासँग जोडेर व्याख्या गरिएको बताउनुभयो । नयाँघरेले नियात्राको मूल शक्ति लेखकको अवलोकन क्षमता र संवेदनशीलता हो, जुन पुस्तकभरि प्रस्ट देखिने उल्लेख गर्नुभयो ।

लेखक प्रतीक ढकालले पुस्तकलाई विश्वलाई नेपाली दृष्टिकोणबाट बुझ्ने प्रयासका रूपमा व्याख्या गर्नुभयो । उहाँले लेखक गैरेले विदेशी भूगोल र समाजको वर्णन गर्दा आफ्नै देश, समाज र संस्कृतिसँग तुलना गर्ने शैली अपनाएको बताउनुभयो ।

साहित्यकार दामोदर पुडासैनी ‘किशोर’ ले पुस्तकलाई विभिन्न देशका भूगोलभित्र मानव सभ्यताको विकासक्रम खोज्ने कृतिका रूपमा चित्रण गर्नुभयो । उहाँले भ्रमण गरेका स्थानहरूलाई केवल मनोरञ्जनको विषय नबनाई त्यहाँको इतिहास, राजनीतिक परिवेश, सांस्कृतिक विविधता र सामाजिक संरचनासमेत समेटेको बताउनुभयो । 

नियात्राकार जय छाङ्छाले पुस्तकको भाषाशैली, प्रस्तुतीकरण र दृश्यात्मक वर्णनको विशेष रूपमा प्रशंसा गर्नुभयो । नियात्राकार भवानी खतिवडाले पुस्तकले विश्व नागरिकताको चेतना विस्तार गर्ने धारणा व्यक्त गर्नुभयो । उहाँले सीमित भूगोलमा केन्द्रित सोचलाई फराकिलो बनाउँदै विभिन्न संस्कृति, भाषा र जीवनपद्धतिप्रति सम्मान जगाउने क्षमता पुस्तकमा रहेको बताउनुभयो । 

पुस्तकमा समेटिएका पाँच देशका अनुभवले पाठकलाई फरक–फरक सभ्यता र जीवनशैलीसँग परिचित गराउँछन्। मलेसियासम्बन्धी अध्यायमा बहुसांस्कृतिक समाज, आधुनिक सहरी विकास र दक्षिणपूर्वी एसियाली जीवनशैलीको चित्रण गरिएको छ। भियतनामको सन्दर्भमा युद्धको इतिहास, राष्ट्रिय आत्मसम्मान र तीव्र विकास यात्रालाई नियात्रात्मक शैलीमा प्रस्तुत गरिएको छ।

त्यसैगरी भारतको गोवामा समुद्री संस्कृति, पर्यटन उद्योग, उपनिवेशकालीन इतिहास र बहुसांस्कृतिक जीवनका विविध आयामहरू समेटिएका छन्। फिलिपिन्सका टापु, समुद्री जीवन, स्थानीय समुदाय र प्रकृतिको अनुपम सौन्दर्यलाई पुस्तकमा विशेष स्थान दिइएको छ। यस्तै जर्जिया भ्रमणका क्रममा लेखकले युरोप र एसियाको सङ्गमस्थल मानिने उक्त देशको इतिहास, संस्कृति, धार्मिक सम्पदा, काला सागर क्षेत्रको भूगोल तथा स्थानीय जनजीवनलाई रोचक शैलीमा प्रस्तुत गरेका छन्।