पाल्पा टिप्पर दुर्घटना: चार जनाको मृत्यु, सबैको पहिचान खुल्यो
पाल्पा। पाल्पाको माथागढी गाउँपालिका–७ रहबासमा शुक्रबार बेलुका करिब ६ बजे भएको टिप्पर दुर्घटनामा मृत्यु भएका चारै जनाको पहिचान खुलेको छ।
दुर्घटनामा टिप्पर चालक अर्घाखाँचीको सितगंगा नगरपालिका–४ निवासी अन्दाजी २६ वर्षीय चिन्ता बहादुर सुनार, सोही स्थानका २६ वर्षीय सुनिल बिक र रुपन्देहीको देवदह नगरपालिका–२ खैरेनी बस्ने २६ वर्षीय सुनिल नेपालीको घटनास्थलमै मृत्यु भएको प्रहरीले जनाएको छ।
त्यस्तै, दुर्घटनामा घाइते पाल्पाको तानसेन नगरपालिका–१० निवासी ३३ वर्षीय राजन चिदीलाई उपचारका लागि भैरहवा मेडिकल कलेज पठाइएकोमा चिकित्सकले मृत घोषणा गरेका जिल्ला प्रहरी कार्यालय पाल्पाका सूचना अधिकारी होम प्रकाश चौधरीले जानकारी दिनुभयो।
प्रहरीका अनुसार झडेवाबाट रहबासस्थित चुनढुंगा खानीतर्फ जाँदै गरेको लु २ ख ४५२५ नम्बरको टिप्पर ब्रेक फेल भई सडकबाट करिब १०० मिटर तल खसेको थियो।
दुर्घटनाबारे थप अनुसन्धान भइरहेको प्रहरीले जनाएको छ।
