एसीसी प्रिमियर कप: नेपालको पहिलो खेल बहराइनसँग
काठमाडौँ । एसियन क्रिकेट काउन्सिल (एसीसी) ले अगस्ट ३० देखि सेप्टेम्बर १२ सम्म मलेसियामा आयोजना हुने एसीसी प्रिमियर कपको खेल तालिका परिवर्तन गरेको छ । एसीसीले यसअघि सार्वजनिक गरेको तालिकामा केही फेरबदल गरेको हो ।
एसिया कपको छनोटको रुपमा रहेको यस प्रतियोगितामा प्रतियोगितामा १० टोलीको सहभागिता रहनेछ । सहभागी टोलीलाई दुई समूहमा विभाजन गरिएको छ । नेपाल रहेको समूहमा साउदी अरेबिया, मलेसिया, बहराइन र हङकङ रहेको छ ।
अर्को समूहमा युएई, ओमान, सिंगापुर, कुवेत र कतार रहेको छ । नेपालले अगस्ट ३१ तारिख बहराइनसँग पहिलो खेल खेल्नेछ । यस्तै नेपालले दोस्रो खेल सेप्टेम्बर ३ मा मलेसिया, तेस्रो खेल सेप्टरम्बर ६ मा साउदी अरेबिया र चौथो खेल सेप्टेम्बर ८ तारिख हङकङसँग खेल्नेछ ।
समूहमा शीर्ष दुई टोली सेमिफाइनलमा पुग्नेछन् । यस अघि प्रतियोगिताको शीर्ष तीन टोलीले सन् २०२७ मा बङ्गलादेशमा हुने एकदिवसीय एसिया कपमा स्थान बनाउने भनिएपनि एसीसीले अब शीर्ष टोलीले मात्र एसिया कप खेल्न पाउने जनाएको छ ।
यस प्रतियोगिताका लागि नेपाल क्रिकेट सङ्घ (क्यान) ले सोमबार सन्दीप लामिछानेको कप्तानीमा १४ सदस्यीय नेपाली टोलीको घोषणा गरिसकेको छ ।
टोलीमा आशिफ शेख, अर्जुन कुमाल, रोहित पौडेल, देव खनाल, दीपेन्द्रसिंह ऐरी, सन्दीप जोरा, बसिर अहमद, इशान पाण्डे, गुल्शन झा, शेर मल्ल, ललिथ राजवंशी, करण केसी र हेमन्त धामी हुनुहुन्छ ।
