अन्नपूर्ण म्याराथनको उपाधि जुम्लाका मञ्जु रावत र दलबहादुर कुँवरलाई
कास्की । अन्नपूर्ण आधार शिविरदेखि घान्द्रुकसम्म सम्पन्न छैटौँ संस्करणको अन्नपूर्ण म्याराथन–२०८३ मा जुम्लाका धावकहरूले वर्चस्व कायम गरेका छन्।
महिलातर्फ जुम्लाकी मञ्जु रावतले ६ घण्टा १४ मिनेट १९ सेकेण्डमा दूरी पूरा गर्दै उपाधि हात पार्नु भयो । जुम्लाकी राज्यलक्ष्मी रावल दोस्रो र कल्पना बुढा तेस्रो हुन सफल हुनु भयो ।
पुरुषतर्फ जुम्लाकै दलबहादुर कुँवरले ४ घण्टा ४ मिनेट ११ सेकेण्डमा दूरी पार गर्दै प्रथम स्थान हासिल गर्नु भयो । नेपाली सेनाका तिलकबहादुर सुनुवार दोस्रो तथा स्थानीय धावक सचिन गुरुङ तेस्रो हुनु भयो ।
‘सबै मौसमका लागि पर्यटन’ भन्ने मूल नारासहित आयोजित प्रतियोगितामा ६ विदेशी सहित ५१ धावकको सहभागिता रहेको थियो। विजेताहरूले क्रमशः एक लाख ५० हजार, एक लाख र ७५ हजार रुपैयाँ नगदसहित पदक र प्रमाणपत्र प्राप्त गरेका छन्।
अन्नपूर्ण आरोहण दिवसको अवसरमा आयोजना गरिएको म्याराथनको उद्देश्य अन्नपूर्ण क्षेत्रको पर्यटन प्रवर्द्धन तथा खेल पर्यटनको विकास गर्नु रहेको आयोजक अन्नपूर्ण सेन्चुरी पर्यटन समिति घान्द्रुकले जनाएको छ।
