गलत जानकारीको आधारमा शरणार्थी मुद्धा दायर गर्ने वकिल र आवेदकहरू विरुद्ध कडा कारबाही गर्ने डिएचएसको चेतावनी

वाशिंगटन । अमेरिकी गृह सुरक्षा विभाग (डिएचएस) ले मंगलबार आफ्ना मातहतका निकायहरूलाई आप्रवासन वकिलहरू विरुद्ध कडा निगरानी र कारबाही बढाउन कडा निर्देशनहरू जारी गरेको छ। ट्रम्प प्रशासनले झूटा बयान र नक्कली कागजातहरूको आधारमा शरण मुद्दा दायर गर्ने वकिलहरू र उनीहरूका ग्राहकहरू विरुद्ध कडा कानुनी कारबाही गर्ने चेतावनी दिएको छ।

होमल्याण्ड सुरक्षाले आइस वकिलहरूलाई प्रशासनिक ठगी मुद्धाहरूलाई आक्रामक रूपमा अगाडि बढाउन निर्देशन दिने गोप्य ज्ञापनपत्र जारी गरेको छ। आन्तरिक निर्देशनले अब शरणको लागि आवेदन दिँदा झूट बोल्ने आप्रवासीहरूलाई मात्र नभई उनीहरूका मुद्दाहरू सम्हाल्ने र उनीहरूलाई झूट बोल्न सिकाउने वकिलहरूलाई पनि लक्षित गर्नेछ।

आन्तरिक ज्ञापनपत्रका अनुसार लाखौं कागजात नभएका आप्रवासीहरूले वर्षौंदेखि अमेरिकी अध्यागमन प्रणालीलाई ठगी गरिरहेका छन्, जसमा अध्यागमन अदालतहरूमा सबैभन्दा बढी दुर्व्यवहारहरू प्रचलित छन्। ज्ञापनपत्रले आइसलाई वर्षौंदेखि निष्क्रिय रहेका विद्यमान, कडा कानूनहरूलाई पूर्ण रूपमा पुनर्जीवित गर्न र वकिलहरू विरुद्ध प्रयोग गर्ने मार्ग प्रशस्त गर्दछ।

शरण दाबीहरू दुर्लभ र सीमित परिस्थितिहरूमा मात्र स्वीकृत गरिनुपर्ने भए तापनि प्रशासनले दाबी गर्छ कि वकिलहरूले अब लगभग हरेक कागजात नभएका आप्रवासीलाई देशमा राजनीतिक वा जातीय जोखिमहरूको बारेमा झूटा कथाहरू बनाउन सिकाउँछन्।

यदि प्रस्तुत गरिएको विवरण गलत प्रमाणित भयो भने, सरकारले सुरुमा जरिवाना लगाउने आशयको सूचना जारी गर्नेछ। यस प्रक्रिया अन्तर्गत दोषी पाइएमा, दण्डहरू धेरै गम्भीर छन्। पहिलो पटकको अपराधले प्रति झूटा कागजात वा झूटा बयान $४,७३० सम्म जरिवाना हुन सक्छ। बारम्बार गरिएको अपराधको लागि, जरिवाना प्रति कागजात $११,८२३ सम्म बढ्न सक्छ।

दोषी पाइएका वकिलहरूलाई निलम्बन गरिनेछ वा स्थायी रूपमा अध्यागमन अदालतमा वकालत गर्नबाट प्रतिबन्ध लगाइनेछ र उनीहरूको इजाजतपत्र खारेजीको लागि सम्बन्धित बार एसोसिएसनलाई सिफारिस गरिनेछ। गम्भीर ठगी अभ्यासहरूमा संलग्न वकिलहरूलाई फौजदारी अभियोजनको अधीनमा राखिनेछ र जेल पठाइनेछ।

न्यूयोर्क र फ्लोरिडामा ठगी शरण घोटाला चलाउने धेरै वकिलहरू र दलालहरूलाई पहिले नै पाँच देखि २० वर्षको जेल सजाय सुनाइएको छ। यो नयाँ उपाय राष्ट्रपति डोनाल्ड ट्रम्पको “अमेरिकालाई आप्रवासीहरूको अतिक्रमणबाट जोगाउने” अभियानको अंश हो। मार्चमा, राष्ट्रपति ट्रम्पले गृह सुरक्षा विभागलाई “व्यर्थ, अनुचित र उत्तेजक” मुद्दा दायर गरेर सरकारलाई सताउने वकिलहरू र ठूला कानुनी फर्महरूमाथि कारबाही गर्न निर्देशन दिए।

होमल्याण्ड सेक्युरिटीको दाबी छ कि अध्यागमन वकिलहरू र ठूला कानुनी फर्महरूले प्रायः आफ्ना ग्राहकहरूलाई आफ्नो विगत लुकाउन वा शरण दाबीलाई बलियो बनाउन झूट बोल्न तालिम दिन्छन्। यो नयाँ कडा निर्देशनसँगै, अब संयुक्त राज्य अमेरिकामा शरण मुद्धा लडिरहेका नेपाल र अन्य देशका आप्रवासीहरू र उनीहरूका वकिलहरूले कानुनी कागजात र बयान पेश गर्दा थप सावधानी अपनाउनुपर्ने देखिन्छ।