सङ्खुवासभाको मकालुमा पहिराेले दुई सय १८ भेडा पुरियो
संखुवासभा। लगातारको वर्षापछि आएको बाढीका कारण संखुवासभाको मकालु गाउँपालिका–५ फोक्टेस्थित पाखुरी खोलामा ठूलो क्षति भएको छ । बाढीमा परी स्थानीय कृषक दलबहादुर गुरुङका २ सय १८ भेडा बेपत्ता भएका छन् ।
जिल्ला प्रहरी कार्यालय संखुवासभाका अनुसार शनिबार बिहान करिब २ बजे आएको बाढीले चरन क्षेत्रमा रहेका गुरुङका २ सय ५० भेडामध्ये अधिकांश बगाएको हो । हालसम्म ३२ वटा भेडा मात्र जीवित अवस्थामा फेला परेका छन् ।
घटनाका क्रममा भेडा रेखदेखमा खटिएका कमल गुरुङ सकुशल रहेका छन् भने झलक गुरुङको हात र खुट्टामा सामान्य चोट लागेको प्रहरीले जनाएको छ । घाइतेको अवस्था सामान्य रहेको बताइएको छ ।
जिल्ला प्रहरी कार्यालय संखुवासभाका प्रहरी नायब उपरीक्षक कुमारप्रसाद मैनालीका अनुसार बेपत्ता भेडाको खोजी कार्य जारी रहेको छ ।
घटनाको जानकारी प्राप्त हुनासाथ प्रहरी चौकी नुमबाट प्रहरी सहायक निरीक्षक कमल श्रेष्ठको नेतृत्वमा टोली घटनास्थलतर्फ परिचालन गरिएको मैनालीले जानकारी दिए ।
प्रहरीका अनुसार घटनास्थल प्रहरी चौकी नुमबाट करिब ४० किलोमिटर टाढा रहेको छ । दुर्गम भूगोलका कारण त्यहाँ पुग्न पैदल करिब १० घण्टा लाग्ने गर्दछ ।
लगातारको वर्षासँगै जिल्लाका उच्च पहाडी तथा हिमाली क्षेत्रमा बाढीपहिरोको जोखिम बढ्दै गएको भन्दै प्रशासनले स्थानीयवासीलाई सतर्कता अपनाउन आग्रह गरेको छ ।
