शान्तिपूर्ण वातावरणमा निर्वाचन सम्पन्न गर्नु सरकारको उच्च प्राथमिकता: प्रधानमन्त्री कार्की
काठमाडौँ । प्रधानमन्त्री सुशीला कार्कीले भयरहित र शान्तिपूर्ण वातावरणमा निर्वाचन सम्पन्न गर्नु सरकारको उच्च प्राथमिकता रहेको बताउनुभएको छ ।
प्रधानमन्त्री कार्कीले सरकारका प्राथमिकता बारे छलफल गर्न आज सिंहदरबारमा बोलाउनुभएको सर्वदलीय बैठकमा राजनीतिक विवादको समाधान खोज्दै निर्भयपूर्वक मतदान गर्न सक्ने वातावरण बनाउन सरकार प्रतिबद्ध रहेको बताउनुभयो ।
छलफलमा प्रधानमन्त्री कार्कीले फागुन २१ मा प्रतिनिधिसभा सदस्य निर्वाचन सम्पन्न गर्ने संवैधानिक दायित्व र निर्वाचनको अनिवार्यताका बारे सरकार दृढ र स्पष्ट रहेको धारणा राख्नुभयो ।
सो अवसरमा प्रधानमन्त्री कार्कीले संसद् पुनर्स्थापनाको माग र सरकारको वैधानिकतामाथि प्रश्न उठाउने कार्यले पुनः राष्ट्रलाई अस्थिरताको तर्फ धकेल्न सक्ने भन्नुहुँदै हाल मुलुकलाई संवैधानिक निकास दिन निर्वाचन बाहेकको विकल्प नरहेको पनि प्रष्ट पार्नुभयो ।
यस्तै प्रधानमन्त्री कार्कीले निर्वाचनको संघारमा राजनीतिक आचार र अभिव्यक्तिमा पनि ध्यान नदिएको भन्नुहुँदै केही नेताहरूले प्रयोग गरेका द्वेषपूर्ण शब्दावलीहरूले राजनीतिक र सामाजिक वातावरणलाई दूषित बनाएको टिप्पणी गर्नुभयो ।
प्रधानमन्त्री कार्कीले निर्वाचन आयोगलाई बलियो र प्रभावकारी बनाउन, यसको सुदृढीकरणका लागि आवश्यक सबै प्रकारका सहयोग गर्ने घोषणा पनि गर्नुभयो ।
प्रधानमन्त्री कार्कीले आह्वान गर्नुभएको सर्वदलीय बैठकमा निर्वाचन आयोगमा दर्ता भएका सबै दलहरूलाई छलफलमा आमन्त्रण गर्नुभएको थियो ।
