फागुन २१ का लागि मेरो २१ दिन अभियान सुरु गर्दै नेपाली काँग्रेस
काठमाडौँ I नेपाली काँग्रेसले प्रतिनिधि सभा सदस्य निर्वाचनका लागि पार्टी सम्बद्ध नेता कार्यकर्तालाई परिचालन गर्न भन्दै फागुन २१ का लागि मेरो २१ दिन कार्यक्रम सुरु गर्ने भएको छ ।
पार्टी केन्द्रीय कार्यसम्पादन समितिको आज बसेको भर्चुअल बैठकले निर्वाचनलाई लक्षित गर्दै फागुन २१ का लागि मेरो २१ दिन कार्यक्रम गर्ने निर्णय गरेको हो । त्यसका लागि काँग्रेसले नेपाली काँग्रेस निर्वाचन परिचालन निर्देशिका ०८२ को बुँदा नम्बर २१ मा यो विषय उल्लेख गरेको छ ।
फागुन २१ का लागि मेरो २१ दिन भन्ने प्रतिबद्धताका साथ फागुन १ देखि २१ गतेसम्म जसको पदीय जिम्मेवारी जहाँ तोकिन्छ त्यहाँ खट्ने निर्णयमा भनिएको छ ।
यसरी खटिँदा केन्द्र, प्रदेश, जिल्ला र क्षेत्रले निश्चित जिम्मेवारी साथ निश्चित ठाउँमा तोकेका प्रतिनिधि यथास्थानमा कार्य सकेर पुनः आफ्नै जिल्ला, क्षेत्र, पालिका र वडामा केन्द्रित रहन पनि निर्णयमा भनिएको छ ।
यस्तै तोकिएको जिम्मेवारी लिएर अन्यत्र गएका बाहेक अरू सबै तहका पार्टी पदाधिकारी र सदस्यहरू आ–आफ्नो क्षेत्र, पालिका र वडामा केन्द्रित रहने निर्णय पनि बैठकले गरेको छ ।
यसैगरी एउटा वडाको क्रियाशील सदस्य अर्को वडामा नगएर आ–आफ्नै वडामा खट्न तथा सबै भातृ र शुभेच्छुक संस्थामा आवद्धहरूलाई सोही बमोजिम जिम्मेवारी निभाउन आग्रह गरेको छ ।
