पाँचथरमा पहिरोमा पुरिएर दुई जनाको मृत्यु, तीन घाइते
फिदिम । अविरल वर्षापछि आएको पहिरो र बाढीका कारण पाँचथरको तुम्बेबा र फाल्गुनन्द गाउँपालिकामा दुई जनाको मृत्यु भएको छ।
मृत्यु हुनेमा तुम्बेवा गाउँपालिका–४ ओलनेकी ७९ वर्षीया कान्छीमाया शेर्मा र फाल्गुनन्द गाउँपालिका ३ का १७ वर्षीय छोरा मिसेक नेम्वाङ रहेको पाँचथर प्रहरीले जानकारी दिएको छ ।
शेर्माको घर माथिबाट आएको पहिरोले पुर्दा घटनास्थलमै ज्यान गएको हो यस्तै नेम्वाङको निबु खोलाले बगाउँदा ज्यान गएको जिल्ला प्रहरी कार्यालय पाँचथरका सूचना अधिकारी रुपेश तामाङले जानकारी दिनुभयो।
उहाँका अनुसार पहिरोमा परेर तीनजना घाइते भएका छन्। मिक्लाजुङ गाउँपालिका–३ सोलुम्बाकी ३७ वर्षीया श्रीमती मनमाया कार्की, फाल्गुनन्द ५ जौवारीका ६६ वर्षीय धनबहादुर चेम्जोङ र फाल्गुनन्द गाउँपालिका–१ आलुवारीकी ७२ वर्षीया सुकमाया आङदेम्बे घाइते हुनुभएको हो।
जिल्लामा निरन्तर वर्षा जारी रहेकाले थप क्षति हुने सम्भावना रहेको र प्रहरी तथा स्थानीयवासी उद्धार र सुरक्षामा परिचालित रहेको प्रहरीले जनाएको छ।
