एमालेको निर्वाचन कार्यतालिका सार्वजनिक : पुस १ गते मतदान

काठमाडौँ । नेपाल कम्युनिष्ट पाटी (एमाले) को ११औँ राष्ट्रिय महाधिवेशनबाट नयाँ नेतृत्व चयनका लागि निर्वाचन कार्यतालिका सार्वजनिक भएको छ।

निर्वाचन कार्यतालिका अनुसार आइतबार साँझ ७:०० बजेसम्म मतदाता नामावली प्रकाशन, सोमबार बिहान ८ः०० देखि ९ः०० बजेसम्म मतदाता नामावली उपर दाबी विरोध÷सुधार, सोही दिन बिहान ९ः३० बजे मतदाता नामावली उपर गरेको दाबी विरोध र सुधारको सुचना प्रकाशन, बिहान १०ः०० बजे दाबी विरोध उपर छानबिन र निर्णय गर्ने कार्यतालिका तय भएको नेकपा एमालेको केन्द्रीय निर्वाचन अयोगका अध्यक्ष डा.विजय सुब्बाले जानकारी दिनुभयो ।

यसैगरी, २९ गते बिहान १०ः१५ बजे अन्तिम मतदाता नामावली प्रकाशन, ९ः०० देखि १२ः०० बजेसम्म उम्मेदवारको दरखास्त फाराम वितरण, १०ः३० देखि १ः३० सम्म उम्मेदवारको दरखास्त फाराम दर्ता, २ः३० बजे उम्मेदवारको प्रारम्भिक नामावली प्रकाशन, २ः३० देखि ३ बजेसम्म उम्मेदवारको विरोधमा उजुरी दिने, ३ः१० बजे उजुरी उपर छानबिन र निर्णय, ३ः१० देखि ५ बजेसम्म उम्मेदवारको नाम फिर्ताको समय तय भएको उहाँले बताउनुभयो ।

निर्वाचन कार्यतालिका अनुसार पुस १ गते मङ्गलबार बिहान ११:०० बजेदेखि ५:०० बजेसम्म मतदानको कार्यतालिका रहेको छ। मतदान पश्चात् सोही दिन मतगणना, निर्वाचन परिणाम घोषणा गरिने छ।