अभिनेता टोबी मग्वायरले आफ्नी पूर्वपत्नी जेनिफर र अर्बपति जेफ्रीको विवाह गराए
लस एन्जलस । अभिनेता टोबी म्याग्वायरले शनिबार, अक्टोबर १० मा हवाईमा आफ्नी पूर्वपत्नी तथा गहना डिजाइनर जेनिफर मेयर र उनका पति, उद्यमी जेफ्री ओगुनलेसीको विवाह सम्पन्न गराए।
यो समारोह ‘फोर सिजन्स रिसोर्ट लानाई’ मा आयोजना गरिएको थियो र यसमा लियोनार्डो डिक्याप्रियो, जेफ बेजोस, कोर्टनी कक्स र राचेल जोई लगायतका धेरै चर्चित व्यक्तिहरूको उपस्थिति थियो।
म्याग्वायर र मेयरले आफ्नो सम्बन्धविच्छेदको घोषणा गरेको झन्डै एक दशकपछि, सेप्टेम्बर २१ मा उनीहरूको सम्बन्धविच्छेदको प्रक्रिया औपचारिक रूपमा टुंगिएको केही समयमै यो विवाह सम्पन्न भएको हो।
अलग भए पनि, यो पूर्व जोडीले आफ्ना दुई सन्तान—रुबी स्विटहार्ट र ओटिस टोबियास—को संयुक्त रूपमा हेरचाह गर्ने क्रममा घनिष्ठ सम्बन्ध कायम राखेका छन्।
दुवै बालबालिका आफ्नी आमाको विवाहमा सहभागी भए; साथै, ओगुनलेसीसँग मेयरकी नवजात छोरी पनि त्यहाँ उपस्थित थिइन्।
४९ वर्षीया मेयरले यस निजी समारोहका लागि ‘स्ट्र्यापलेस’ (काँधमा फीता नभएको) सेतो गाउन लगाएकी थिइन् भने ओगुनलेसीले कालो सुट र ‘बो-टाई’ रोजेका थिए। पाहुनाहरूको सूचीमा डिक्याप्रियोकी प्रेमिका भिट्टोरिया सेरेटी र जेफ बेजोसकी पत्नी लरेन सान्चेज बेजोस पनि समावेश थिए।
