नेपालद्वारा मलेसिया ९ विकेटले पराजित
काठमाडौँ । एसीसी प्रिमियर कप खेल्ने तयारीमा रहेको नेपाली राष्ट्रिय क्रिकेट टोलीले मङ्गलवार मलेसियालाई डिएलएस प्रणालीमा ९ विकेटले हराएको छ ।
नेपालले २ सय ३३ रनको लक्ष्य पछ्याउँदा वर्षा भएपछि ४८ ओभरमा २ सय २८ रनको लक्ष्य पायो । नेपालले त्यो लक्ष्य २८ ओभरमा १ विकेटको गुमाएर पूरा गर्यो ।
ओपनर आसिफ शेखले सानदार शतकीय प्रदर्शन गरे । आसिफले १ सय ६१ रन बनाए । उनले अर्जुन कुमालसँगको दोहोरो शतकीय साझेदारी गरे ।
८५ बल खेलेका आसिफले समान १२ चौका र छक्का प्रहार गरे । उनको विकेट अस्लम खान मलिकले लिएका थिए । आसिफले पहिलो विकेटको लागि अर्जुनसँग २ सय २० रनको साझेदारी गरे । अर्जुन ६१ र देव खनाल १ रनमा अविजित रहे ।
त्यसअघि टस जितेर पहिले ब्याटिङ गरेको घरेलु टोली मलेसियाले ४८.२ ओभरमा अलआउट हुँदै २ सय ३२ रन बनाएको थियो ।
मलेसियाका लागि मुहम्मद स्याहादात रामलीले सर्वाधिक ६१ रन बनाए । सैफुल्लाह मलिकले ४५, साइद अजिजले ४० र विरानदीप सिंहले ३९ रन जोडे । नेपालका लागि कप्तान सन्दीप लामिछानेले ४ विकेट लिए । करण केसीले २ तथा ललित राजवंशी र दीपेन्द्रसिंह ऐरीले समान १ विकेट हात पारे ।
नेपालले मलेसिया जानुअघि भारतमा कर्नाटकसँग भएको दुई खेल खेल्दै दुवै खेल जितेको थियो । अगस्ट ३१ मा बहराइनसँग खेल्दै नेपालले प्रिमियर कपको सुरुवात गर्नेछ ।
