पृथ्वीराजमार्गको सेराटारमा गएको सुख्खा पहिरोका कारण दुवैतर्फ सडक अवरुद्ध

तनहुँ । पृथ्वीराजमार्ग अन्तर्गत तनहुँको शुक्लागण्डकी नगरपालिका–७ सेराटारमा सुख्खा पहिरो खस्दा सडक पूर्ण रूपमा अवरुद्ध भएको छ । शनिबार साँझ करीव ५ बजे सडकभन्दा करिब ३० मिटर माथिबाट अचानक पहिरो खसेपछि राजमार्गको दुवैतर्फको यातायात ठप्प भएको हो ।

पहिरो खसेको सूचना पाउनासाथ इलाका प्रहरी कार्यालय बेलचौताराबाट प्रहरी निरीक्षक धननारायण श्रेष्ठको कमाण्डमा १५ जनाको प्रहरी टोली तत्काल घटनास्थलमा खटिएको छ ।

जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक द्धारिकाप्रसाद घिमिरेका अनुसार अहिले प्रहरी टोली र दुई वटा जेसिबीको प्रयोग गरी तदारुकताका साथ पहिरो पन्छाउने काम भइरहेको छ ।

“पहिरो पन्छाएर राजमार्ग सञ्चालनमा ल्याउन प्रहरी र जेसिबीको सहयोगमा निरन्तर काम भइरहेको छ’’, घिमिरेले भन्नुभयो । सडक अवरुद्ध हुँदा पृथ्वीराजमार्ग भएर गन्तव्यतर्फ गइरहेका सवारी साधनहरू तथा यात्रुहरू बीच बाटोमै रोकिएका छन् । पहिरो हटाएर जतिसक्दो चाँडो यातायात सहज बनाउने प्रयास भइरहेको प्रहरीले जनाएको छ ।