नेपाल र भारतबीच निकासी गरिने वस्तु आइपुग्नु अगावै सूचना आदान प्रदान गर्ने समझदारी

काठमाडौँ । नेपाल र भारतबीच निकासी गरिने वस्तु आइपुग्नु अगावै सूचना आदान प्रदान गर्ने समझदारी भएको छ ।

समझदारी पत्रमा आज भारतको नयाँदिल्लीमा आयोजित कार्यक्रममा नेपालको तर्फबाट भन्सार विभागका महानिर्देशक श्याम प्रसाद भण्डारी र भारतका तर्फबाट केन्द्रीय अप्रत्यक्ष कर तथा सीमा शुल्क बोर्डका अध्यक्ष विवेक चतुर्वेदीले हस्ताक्षर गर्नुभएको छ ।

वस्तुको आगमन पूर्व सूचना आदान प्रदान गर्दै जोखिम व्यवस्थापनमार्फत व्यापार सहजीकरण गर्न प्रमुख व्यापारिक साझेदार मुलुकहरूका बीच निकासी गरिने वस्तुको अग्रिम रूपमा तथ्याङ्क आदान–प्रदान गर्ने अन्तर्राष्ट्रिय अभ्यास रहँदै आएको अर्थ मन्त्रालयले जनाएको छ ।

हस्ताक्षर कार्यक्रममा भन्सार विभागका महानिर्देशक भण्डारीले समझदारीलाई जतिसक्दो छिटो कार्यान्वयनमा लैजान जोड दिँदै यसले दुवै देशको भन्सार प्रशासन बीचको सम्बन्धलाई थप मजबुत बनाउन सहयोग पुग्ने बताउनुभयो ।

उहाँले समझदारीले जोखिम देखिएका वस्तुलाई निगरानी तथा नियमन गर्न र सही कारोबार गर्ने व्यवसायीलाई थप सहजीकरण गरी भन्सार जाँच पासलाई छिटो छरितो र सहज बनाउन सहयोग पुग्ने बताउनुभयो ।

त्यसैगरी CBIC का अध्यक्ष विवेक चतुर्वेदीले समझदारीको शीघ्र कार्यान्वयनको लागि प्रतिबद्धता व्यक्त गर्नुभयो ।