चैत १२ मा नवनिर्वाचित सांसदलाई शपथ, दुई घण्टा अगावै उपस्थित हुन सचिवालयको आह्वान
काठमाडौं । संघीय संसद् सचिवालयले प्रतिनिधिसभाका नवनिर्वाचित सांसदलाई शपथ कार्यक्रममा उपस्थित हुन सार्वजनिक सूचना जारी गरेको छ।
सचिवालयका अनुसार सांसदहरूको शपथ यही चैत १२ गते बिहीबार दिउँसो २ बजे सिंहदरबारस्थित निर्माणाधीन संघीय संसद् भवनको बहुउद्देश्यीय सभाकक्षमा हुनेछ।
शपथका लागि निर्वाचन आयोगबाट प्राप्त प्रतिनिधिसभा सदस्य पदको प्रमाणपत्रको सक्कल र प्रतिलिपि, नेपाली नागरिकताको प्रमाणपत्रको प्रतिलिपि तथा हालसालै खिचिएको पासपोर्ट साइजको दुई प्रति फोटो अनिवार्य ल्याउन भनिएको छ।
सचिवालयले निर्धारित समयभन्दा दुई घण्टाअगावै औपचारिक वा सांस्कृतिक पहिचान झल्किने पोशाकमा उपस्थित हुन आग्रह गरेको छ।
नेपाली भाषाबाहेक मातृभाषामा शपथ लिन चाहने सदस्यहरूले प्रतिनिधि सभा सदस्य निर्वाचन ऐन, २०७४ को अनुसूची–३ अनुसारको शपथको व्यहोरा सम्बन्धित भाषामा अनुवाद गरी सोको प्रति शपथ कार्यक्रमभन्दा तीन दिनअघि सचिवालयमा बुझाउनुपर्ने सूचनामा उल्लेख छ।
यसैबीच, सचिवालयले देशभरका जिल्ला प्रशासन कार्यालयहरूलाई आ–आफ्नो जिल्लाका निर्वाचित प्रतिनिधिसभा सदस्यहरूलाई सूचनाबारे जानकारी गराउन समन्वय गर्न अनुरोध गरेको छ।
