बागमतीका मुख्यमन्त्री लामाले आजै राजीनामा दिने, बानियाँ प्रदेशका नयाँ मुख्यमन्त्री

हेटौंडा । बागमती प्रदेशका मुख्यमन्त्री बहादुर सिंह लामाले आज आफ्नो पदबाट राजीनामा दिदै छन् । यस अघि १४ साउनमा नेपाली कांग्रेस बागमती प्रदेश संसदीय दलको निर्वाचनमा इन्द्रबहादुर बानियाँसँग पराजित भएपछि मुख्यमन्त्री पदबाट राजीनामा दिन दबाब खेपेका लामाले आइतबार बिहान हेटौंडा आएर राजीनामा दिने निश्चित भएको हो ।

प्रदेश सांसद रमेश महतका अनुसार शनिवार कांग्रेस सभापति शेरबहादुर देउवासँग बानियाँ र लामाले संयुक्त भेट गरेका थिए । भेटपछि लामा राजीनामा दिन तयार भएका हुन् ।

महतका अनुसार काठमाडौंमा उपचार गराइरहेका प्रदेश प्रमुख देवकोटा आज हेटौंडा फर्किए पछि उनलाई राजीनामा बुझाउने तयारी छ ।

लामाले राजीनामा दिएसँगै बागमतीको नयाँ मुख्यमन्त्री कांग्रेस संसदीय दलको नेताको रूपमा इन्द्र बानियाँ हुनेछन् ।