संसदीय समितिबाट प्रधानन्यायाधीशमा डा. मनोज शर्माको नाम सर्वसम्मत अनुमोदन
काठमाडौँ । सर्वोच्च अदालतको प्रधानन्यायाधीशका रूपमा डा. मनोज शर्माको नाम संसदीय समितिबाट सर्वसम्मत अनुमोदन भएको छ । मङ्गलबार संसदीय सुनुवाइपछि समितिबाट शर्माको नाम सर्वसम्मत अनुमोदन भएको हो ।
समितिका सभापति बोधनारायण श्रेष्ठले २०८३ वैशाख २४ गते सिफारिस अनुसार डा. शर्माको नाम प्रधानन्यायाधीशमा सर्वसम्मत अनुमोदन भएको जानकारी दिएका छन् ।
सभापति श्रेष्ठले भने, ‘संवैधानिक परिषद्को २०८३ वैशाख २४ गतेको निर्णय बमोजिम नेपालको प्रधानन्यायाधीश पदमा नियुक्तिको लागि सिफारिस हुनुभएका सर्वोच्च अदालतका न्यायाधीश डा. मनोजकुमार शर्माको नाम संघीय संसदको संयुक्त बैठक र संयुक्त समिति कार्यसञ्चालन नियमावली २०८० को नियम २६ को उपनियम ५ बमोजिम सर्वसम्मत अनुमोदन गर्ने निर्णय भएको छ ।’
संसदीय सुनुवाइ समितिमा प्रस्तावित प्रधानन्यायाधीश डा. मनोजकुमार शर्माको संसदीय सुनुवाइ भएको हो । समितिले मङ्गलबार बिहान प्रस्तावित प्रधानन्यायाधीश शर्माको कार्ययोजना र उजुरी अध्ययन गर्न बैठक बोलाएको थियो ।
