कतार पठाउने भन्दै ४८ लाख ठगी गर्ने मानव तस्कर नारायण जोशी पक्राउ
काठमाडौँ । कतार पठाउने भन्दै ४८ लाख रुपियाँ ठगी गर्ने मानव तस्कर नारायण जोशी पक्राउ परेका छन् ।
काठमाडौँ उपत्यका अपराध अनुसन्धान कार्यालय, टेकुका सूचना अधिकारी प्रहरी उपरीक्षक रामेश्वर कार्कीका अनुसार मोरङ कटहरी गाउँपालिका वडा नं. ६ का स्थायी बासिन्दा जोशी धनुषा जनकपुरधाम उपमहानगरपालिका वडा नं. ४ बाट पक्राउ परेका हुन् ।
यसैगरी, इराक पठाउने भनी २० लाख रुपियाँ ठगी गर्ने ४३ वर्षीय गोपाल विक्रम राना, अष्ट्रेलिया पठाउने भनी तीन लाख ठगी गर्ने नवराज पौड्याल र क्रोएसिया पठाउने भनी दश लाख रुपियाँ ठगी गर्ने ङवाङ लामा पक्राउ परेका छन् ।
स्थायी घर सुर्खेत बराहाताल गाउँपालिका वडा नं. २ का राना काठमाडौँको टेकुबाट, भक्तपुर मध्यपुर ठिमी नगरपालिका १० का पौड्याल काठमाडौँको पुतलीसडकबाट र मनाङ नासोँ गाउँपालिका वडा नंं. ६ का लामा काठमाडौँ नागार्जुन नगरपालिका वडा नंं. ८ बाट पक्राउ परेका हुन् ।
उनीहरुले बेरोजगार युवायुवतीलाई आकर्षक तलबको प्रलोभनमा रोजगारीका लागि विदेश लैजाने भन्दै लामे समयसम्म झुक्यानमा राखि सम्पर्कविहिन बनेका थिए ।
पक्राउ परेकालाई थप अनुसन्धान तथा आवश्यक कारवाहीका लागि वैदेशिक रोजगार विभाग, ताहाचल पठाइएको प्रहारीले जनाएको छ ।
