एनपिएलः कर्णाली याक्सविरुद्ध काठमाडौँको जित
काठमाडौँ । काठमाडौँ । कर्णाली याक्समाथि सहज जित निकाल्दै काठमान्डु गोर्खाजले जारी एनपिएलमा चौथो जित दर्ता गरेको छ । खेलमा काठमान्डु ५ विकेटले विजयी भएको हो ।
जितसँगै ६ खेलबाट चौथो जित निकालेको काठमान्डुले ८ अंक जोडेको छ। यता, पाँच खेलमा ४ हार बेहोरेको कर्णालीको प्लेअफको सम्भावना सकिएको छ ।
कर्णालीले दिएको १५० रनको लक्ष्य काठमान्डुले १८ ओभरमा ५ विकेट गुमाएर पूरा गर्यो ।
काठमान्डुको जितमा गेरहार्ड इरास्मसले ४४ रन बनाउँदा जोन सिम्पसनले ४१ रन बनाएर आउट भए । यस्तै, ओपनर बेन चाल्र्सवर्थले ३४ रन बनाए । मिलिन्द्र कुमार १५, तथा ओपनर आकाश त्रिपाठीले ८ रन बनाए ।
यता, कर्णालीको लागि नन्दन यादले सर्वाधिक ३ र पवन शराफले एक विकेट हात पारे । त्यसअघि त्रिवि क्रिकेट रङ्गशालामा टस जितेर पहिले ब्याटिङ थालेको कर्णालीले निर्धारित २० ओभरमा ७ विकेट गुमाएर १४९ रन बनाएको थियो ।
कर्णालीको लागि अल राउन्डर गुलसन झाले सर्वाधिक ४९ रन बनाए ।
यस्तै, पवन शराफले ३५, ओपनर मार्क वार्डले ३० रन बनाउँदा दिपक डुम्रेले १० रन बनाए । काठमान्डुका लागि रासिद खानले दुई विकेट लिए। सन्तोष यादव, मिलिन्द कुमार र कप्तान करण केसीले समान एक विकेट लिए । जारी प्रतियोगितामा पाँच खेलमा दुई जित हात पारेको छ भने कर्णालीले चार खेलमा एक खेल मात्रै जितेको छ। कर्णालीले पछिल्लो दुई खेलमा हार ब्यहोर्दा काठमान्डुले दुवै खेलमा जित हासिल गरेको थियो ।
