आइसीसी टी–२० महिला विश्वकपको ग्लोबल छनोट नेपालमा
काठमाडौँ । आइसीसी टी–२० महिला विश्वकपको ग्लोबल छनोट नेपालमा हुने भएको छ ।
अन्तर्राष्ट्रिय क्रिकेट परिषद् (आइसिसी) ले बिहीबार छनोट खेल नेपालमा गर्ने निर्णय गरेको हो । आइसिसीले छनोटमा सहभागी टोली र समूह विभाजन पनि गरेको छ ।
ग्लोबल छनोट आगामी वर्ष जनवरी १२ देखि फेब्रुअरी २ तारिखसम्म नेपालमा हुनेछ । छनोट खेलमा १० टोलीबिच प्रतिस्पर्धा हुनेछ । हरेक समूहका शीर्ष तीन टोली सुपर सिक्समा पुग्नेछन् ।
सुपर सिक्सको शीर्ष चारमा रहने टोली विश्वकपमा छनोट हुनेछन् । आइसिसीले छनोटको खेल तालिका भने केही समयमा सार्वजनिक गर्ने जनाएको छ । टी–२० महिला विश्वकप आगामी वर्ष इङ्ल्यान्ड र वेल्समा आयोजना हुनेछ ।
नेपालले एसिया छनोटबाट ग्लोबल छनोटमा स्थान बनाएको हो । एसियाबाट नेपाल र थाइल्यान्डले ग्लोबल छनोटमा स्थान बनाएका हुन् । अमेरिका क्षेत्रीय छनोटबाट अमेरिकाले ग्लोबल छनोटमा स्थान बनाएको छ ।
बाँकी पाँच टोलीमा अफ्रिका र युरोपबाट दुई दुई र पूर्वी एसिया/प्रशान्तीय क्षेत्रबाट एक टोलीले ग्लोबल छनोटमा स्थान बनाउनेछ । आइसिसी टी–२० महिला विश्वकपको उपाधि न्युजिल्यान्डले जितेको थियो ।
