अमेरिकी उपविदेशमन्त्री सारा बि रोजर्स आगामी शनिबार नेपाल भ्रमणमा आउदै
काठमाडौं । अमेरिकी उपविदेशमन्त्री सारा बि रोजर्स नेपाल भ्रमणका क्रममा काठमाडौं आइपुग्ने आगामी शनिबार कार्यक्रम छ । रास्वपा वरिष्ठ नेता बालेन शाह नेतृत्वमा नयाँ सरकार गठनपछि तेस्रो अमेरिकी कूटनीतिज्ञले नेपाल भ्रमण गर्न लागेका हुन् ।
उपविदेशमन्त्री रोजर्स काठमाडौंस्थित अमेरिकी दूतावासका पब्लिक अफेयर्स प्रमुख माइक ह्याकरले सगरमाथा आरोहण गरेको अवसरमा बधाई दिन आउन लागेको दूतावासले जनाएको छ । जेठ १७ गते काठमाडौंस्थित होटल अलफ्टमा दूतावासले आयोजना गर्न लागेको ‘नेपाल एसेन्ट समिट’ मा सारा सहभागी हुने बताइएको छ ।
यसअघि दक्षिण तथा मध्य एसिया मामिला हेर्ने अमेरिकी सहायक विदेशमन्त्री समीर पल कपुर वैशाख ७ गते तीन दिने भ्रमणका लागि काठमाडौं आएका थिए । त्यसपछि अमेरिकी राष्ट्रपतिका विशेष दूत तथा भारतका लागि अमेरिकी राजदूत सर्जियो गोरले उच्चस्तरीय भ्रमण गरेका थिए ।
दूतावासका कार्यवाहक राजदूत स्कट अर्बोमसँगै सर्जियो गोरले सगरमाथा आधार शिविर पुगेर उनले ड्रोन उडाएका थिए । सर्जियो गोरले उडाएको ड्रोनबारे कूटनीतिक र राजनीतिक वृत्तमा भूराजनीतिसँग जोडेर चर्चा भएको थियो ।
अहिले आउन लागेकी उपविदेशमन्त्री सारा सगरमाथा आरोहण गरेका उनका काठमाडौंस्थित कूटनीतिक कर्मचारी माइक हार्करको सम्मानमा आयोजना गर्न लागिएको कार्यक्रममा सहभागी हुँदैछिन् । हार्करले जेठ ६ गते बिहान सगरमाथाको सफल आरोहण गरेपछि उनी पदमा कार्यरत रहेकै समयमा सगरमाथा आरोहण गर्ने पहिलो अमेरिकी कूटनीतिक कर्मचारी बनेको दूतावासले जनाएको छ ।
