सौराहा अन्तर्राष्ट्रिय खुला तेक्वान्दो कात्तिकमा
काठमाडौं । चितवन तेक्वान्दो डोजाङको आयोजनामा प्रथम सौराहा अन्तर्राष्ट्रिय खुला तेक्वान्दो प्रतियोगिता कात्तिक १३ गतेदेखि हुने भएको छ ।
प्रतियोगितामा क्योरुगी र पुम्सेमा गरी जम्मा ६४ स्पर्धामा प्रतिस्पर्धा हुने आयोजक डोजाङका प्रमुख रोशन खानले जनाएका छन् । क्योरुगीमा ५४ र पुम्सेमा १० स्पर्धामा खेल हुनेछ ।
नेपालबाट आयोजकको २ र सात प्रदेश गरी ९ टिम सहभागी हुने प्रतियोगिता संयोजक प्रज्ज्वल दवाडीले जानकारी दिए । नेपाली खेलाडीलाई सहभागिता निःशुल्क गरिएको छ भने उनीहरुलाई आयोजकले खाना र बसोवासको व्यवस्था गर्ने छ ।
विदेशी खेलाडीको हकमा दर्ता शुल्क ५० अमेरिकी डलर लाग्ने छ । सोही शुल्कमा आयोजकले उनीहरुको खाना र बसोवासको प्रबन्ध मिलाउने छ ।
बागमती सरकारको मुख्य प्रायोजनमा हुन लागेको प्रतियोगितामा शीर्ष तीन स्थान हात पार्ने टिमले क्रमशः ५० हजार, ३० हजार र २० हजार नगद पुरस्कार प्राप्त गर्ने छन् । क्योरुगी र पुम्सेमा उत्कृष्ट हुने पुरुष÷महिला खेलाडीलाई १ सय अमेरिकी डलर नगद पुरस्कार प्रदान गरिने छ । उत्कृष्ट प्रशिक्षक र रेफ्रीलाई जनही १ सय अमेरिकी डलर नगदबाट पुरस्कृत गरिने छ ।
तीनदिने प्रतियोगिताका खेलहरु चितवनस्थित स्टार बैंक्युटमा खेलाइने छ । प्रतियोगितामा सहभागी हुन इच्छुक खेलाडीले अक्टोबर २० तारिखसम्म नाम दर्ता गराउनु पर्ने छ ।
