न्युयोर्कस्थित संघीय भवनबाहिर एक पूर्वसैनिकले आगो लगाए र पेलेट गनबाट गोली चलाए

न्युयोर्क, (एपी)। सोमबार बिहान म्यानहटनस्थित एक संघीय कार्यालय भवनबाहिर आप्रवासन तथा भन्सार प्रवर्तन निकाय, (आइस) विरोधी प्लेकार्ड बोकेका अमेरिकी सेनाका पूर्वसैनिकले आतिशबाजी पड्काए, आगो लगाए र पेलेट गन (छर्रा हान्ने बन्दुक) प्रहार गरे। सुरक्षा अधिकारीहरूले नियन्त्रणमा लिनुअघि उनले तीन जनालाई घाइते बनाएको अधिकारीहरूले बताएका छन्।

एफबीआईको न्युयोर्क फिल्ड कार्यालयका सहायक निर्देशक जेम्स बार्नाकलका अनुसार ४३ वर्षीय एन्ड्र्यू आराबाका ‘नराम्रो मनसाय बोकेर’ ‘२६ फेडरल प्लाजा’ नामले चिनिने उक्त भवनमा पुगेका थिए। पक्राउ पर्ने क्रममा उनले ‘सरकार र अमेरिका विरोधी अभिव्यक्ति’ दिएका थिए र अनुसन्धानकर्ताहरूलाई आफूले मानिसहरूलाई मारे पनि वास्ता नहुने बताएका थिए।

घटनास्थलमा आयोजित पत्रकार सम्मेलनमा बार्नाकलले भने, “भवनमाथि आक्रमण भएको थियो। श्री आराबाका मानिसहरूलाई घाइते बनाउने र हानि पुर्‍याउने उद्देश्यले आएका थिए।”

घाइतेहरूमध्ये एक व्यक्ति उक्त भवनमा अध्यागमन अदालतको सुनुवाइका लागि आएका थिए। यस भवनमा अमेरिकी अध्यागमन तथा भन्सार प्रवर्तन (आइस), एफबीआई र अन्य संघीय निकायका कार्यालयहरू पनि रहेका छन्। राष्ट्रपति डोनाल्ड ट्रम्पको कडा अध्यागमन नीतिविरुद्ध हुने प्रदर्शनहरूको यो भवन केन्द्र बन्दै आएको छ।

सोमबार साँझसम्म आराबाका विरुद्ध कुनै औपचारिक अभियोग घोषणा गरिएको थिएन। एफबीआईको संयुक्त आतंकवाद कार्यदलले यस घटनाको अनुसन्धान गरिरहेको छ, यद्यपि बार्नाकलले यस आक्रमणलाई आतंकवादी कार्यको संज्ञा दिन अस्वीकार गरे। आराबाकाको पक्षमा बोल्न सक्ने कुनै वकिल छन् वा छैनन् भन्ने कुरा तत्काल स्पष्ट भएन।

न्युयोर्क शहरकी प्रहरी आयुक्त जेसिका टिसका अनुसार आराबाका बिहान साढे ८ बजेतिर ‘२६ फेडरल प्लाजा’ बाहिर सैन्य शैलीको हेल्मेट लगाएर र “हाम्रा सडकबाट आइस हटाइयोस् लेखिएको प्लेकार्ड टाँसिएको एउटा ठेलागाडा लिएर पुगेका थिए। टिसले बताएअनुसार उनको अन्तिम ज्ञात ठेगाना हार्लेममा थियो, यद्यपि उनी शहरबाट करिब ६९ माइल (१११ किलोमिटर) उत्तरमा रहेको पोकिप्सीमा पनि बस्दै आएका थिए।

बार्नाकलका अनुसार आराबाकाले कर्मचारी प्रवेशद्वारबाहिर भुइँमा पेट्रोल खन्याए र लाइटर तथा ठूलो आतिशबाजी प्रयोग गरी आगो लगाए; आतिशबाजीमा पनि आगो लागेको थियो। त्यसपछि उनले ‘एयरसफ्ट राइफल’ निकाले र भवनतर्फ पाँचदेखि सात राउन्ड छर्रा (पेलेट) प्रहार गरे। लगत्तै दुई जना ‘फेडरल प्रोटेक्टिभ सर्भिस’ का अधिकारी र एक सुरक्षा ठेकेदारले दौडेर गई उनलाई नियन्त्रणमा लिए। सन् २००१ देखि २००५ सम्म सेनामा रहँदा ‘प्याट्रियट’ क्षेप्यास्त्र प्रणालीको मर्मतसम्भार गर्ने काम गरेका अराबाकाले पक्राउ पर्ने क्रममा इमिग्रेसन एण्ड कस्टम्स इन्फोर्समेन्ट, (आइस) विरुद्ध “अपमानजनक शब्दहरू” र “गालीगलौज” प्रयोग गरेको बार्नाकलले बताए।

“उनी एक अमेरिकी-विरोधी र सरकार-विरोधी अतिवादी हुन्,” बार्नाकलले भने। “उनका भनाइहरूबाट हामीलाई यो कुरा थाहा छ। पक्राउ परेपछि उनले व्यक्त गरेका कुराहरूबाट पनि हामी यो जान्दछौं। साथै, आज उनले गरेका गतिविधिहरूबाट पनि हामी यो कुरा बुझ्छौं।”

सुरक्षा भिडियोको आधारमा, टिसले घटनाक्रमको अलि फरक विवरण प्रस्तुत गरिन्। उनले बताइन् कि आराबाकाले सुरुमा आतिशबाजीको एक मुठा बाले र त्यसबाट धुवाँ निस्कन थालेपछि आफ्नो कोटबाट पेलेट गन (छर्रा हान्ने बन्दुक) निकालेर भवनतर्फ प्रहार गरे। त्यसपछि, उनले आफ्नो ठेलागाडाबाट सुन्तला रङको बाल्टिन झिके, भवनको वरिपरि रहेका झाडीहरू नजिकै ज्वलनशील तरल पदार्थ खन्याए र आगो लगाए।

घटनास्थलका भिडियो र तस्बिरहरूमा भवन बाहिरको फुटपाथमा धुवाँको मुस्लोसहित आगो बलिरहेको तथा प्रहरी अधिकारीहरूले एक व्यक्तिलाई नियन्त्रणमा लिई लगिरहेको दृश्य देखिन्थ्यो।

टिसका अनुसार, सुरुमा ९११ मा आएको फोन कलमा बन्दुकधारी सक्रिय रहेको खबर दिइएको थियो। त्यसपछिका कलहरूमा विस्फोट भएको र एक व्यक्तिले आतिशबाजी पड्काएको जानकारी प्राप्त भएको उनले बताइन्। बार्नाकलका अनुसार, पेलेट गनका अतिरिक्त आराबाकासँग दुईवटा बन्चरो, तीनवटा स्थिर-ब्लेड (नखुम्चिने) भएका चक्कु, एउटा हथौडा र एउटा खुकुरी वा ठूलो छुरा (म्याचेटी) पनि थिए।

यस घटनामा दुई सरकारी कर्मचारी र आप्रवासन अदालत जाँदै गरेका एक सर्वसाधारण घाइते भए। ‘फेडरल प्रोटेक्टिभ सर्भिस’ र ‘आइस’ सञ्चालन गर्ने ‘डिपार्टमेन्ट अफ होमल्याण्ड सेक्युरिटी’ ले जनाएअनुसार, आतिशबाजीको प्रहारबाट एक बटुवा सामान्य रूपमा घाइते भए। एजेन्सीका अनुसार, आराबाकालाई नियन्त्रणमा लिने प्रयास गर्दा एक सुरक्षा अधिकारीलाई पनि सामान्य चोट लाग्यो। न्युयोर्क सिटी फायर डिपार्टमेन्टले जनाएअनुसार, एक व्यक्तिलाई अस्पताल लगिएको थियो तर उनको चोट ज्यान जाने खालको गम्भीर थिएन।

न्युयोर्कका मेयर जोहरान मामदानीले सामाजिक सञ्जालमा भने, “आज बिहान ‘२६ फेडरल प्लाजा’ बाहिर जे भयो, त्यो अत्यन्तै चिन्ताजनक थियो। मलाई राहत महसुस भएको छ कि कोही पनि गम्भीर रूपमा घाइते भएनन् र संदिग्ध व्यक्ति प्रहरीको नियन्त्रणमा छ।”

आप्रवासीहरू सुनुवाइ सकेर बाहिर निस्कँदा हलवे (गलियारा) भित्रै एजेन्टहरूले अस्तव्यस्त र कहिलेकाहीँ हिंसात्मक तरिकाले पक्राउ गर्ने गरेको यो भवन ‘लोअर म्यानहटन’ स्थित सरकारी भवन र अदालतहरूको समूहमा अवस्थित छ। यो स्थान सिटी हल, न्युयोर्क प्रहरी मुख्यालय र ब्रुकलिन ब्रिजबाट केही ब्लकको दूरीमा पर्छ।

सन् १९९० को दशकमा ‘२६ फेडरल प्लाजा’को सुरक्षा व्यवस्थामा व्यापक वृद्धि गरियो; इजिप्टका शेख ओमर अब्देल-रहमानका अनुयायीहरूले न्युयोर्क सहरका बम आक्रमणको निसानामा परेका पाँचवटा प्रमुख स्थलहरूको सूचीमा यस भवनलाई पनि समावेश गरेको तथ्य सार्वजनिक भएपछि यस्तो कदम चालिएको थियो। त्यसपछि त्यहाँ बुलेटप्रूफ सुरक्षा बुथ जडान गरियो र भवनको पार्किङ ग्यारेज बाहिरको सडकमा अधिकांश सवारी साधनको आवतजावत बन्द गरियो।