इजरायलको केयरगिभिङ क्षेत्रमा काम गर्न लटरीमार्फत ८३६ नेपाली छनोट
स्वास्थ्य परीक्षणमा योग्य ठहरिएका र कुनै आपराधिक रेकर्ड नभएका व्यक्तिहरू दुई महिनापछि चरणबद्ध रूपमा इजरायल जानेछन्। यस द्विपक्षीय सम्झौताअन्तर्गत भर्ना हुने नेपाली कामदारहरूले इजरायली कानुनबमोजिम इजरायली कामदारहरूले सरह न्यूनतम तलब र रोजगारीका सुविधाहरू प्राप्त गर्नेछन्।
काठमाडौँ। इजरायलले पहिलो चरणमा ‘केयरगिभर’ (स्याहारकर्ता) का रूपमा काम गर्न कुल ८३६ जना नेपाली कामदारहरू छनोट गरेको छ।
इजरायलको ‘पपुलेसन एण्ड इमिग्रेसन अथोरिटी’ (पीआईबिए) ले आज इजरायलमा केयरगिभरका रूपमा रोजगारीका लागि नेपाली सहायक कामदारहरू छनोट गर्न ‘लटरी’ (गोलाप्रथा) को प्रत्यक्ष प्रसारण आयोजना गर्यो।
उक्त कार्यक्रममा नेपालका लागि इजरायली राजदूत, वैदेशिक रोजगार विभागका अधिकारीहरू र सञ्चारकर्मीलगायत इजरायलका उच्च अधिकारीहरूको उपस्थिति थियो।
प्रक्रियाको निष्पक्षता र पारदर्शिताप्रति जनविश्वास सुनिश्चित गर्दै उनीहरूले लटरी प्रक्रिया अवलोकन गर्न प्रत्यक्ष प्रसारणमार्फत सहभागिता जनाए। लटरी प्रक्रियामा कुल १,११५ जना उम्मेदवारहरू समावेश थिए, जसमध्ये ७८४ पुरुष र ३३१ महिला थिए।
लटरीमार्फत प्रत्येक श्रेणीबाट ७५ प्रतिशत उम्मेदवारहरू छनोट गरिए, जसको नतिजास्वरूप पहिलो चरणका लागि कुल ८३६ जना उम्मेदवारहरू छनोट भए। नेपालका लागि इजरायली राजदूत स्मुलिक एरी बासले भने, “इजरायलको केयरगिभिङ क्षेत्रमा थप २,१०० भन्दा बढी रोजगारीका अवसरहरू चाँडै खुल्ने अपेक्षा गरिएको छ।”
यसका साथै, इजरायल र नेपालले ‘घरमै आधारित स्याहार सेवा’ र ‘कृषि क्षेत्रका कामदार’ सम्बन्धी दुईवटा द्विपक्षीय सम्झौतालाई अन्तिम रूप दिँदैछन्, जसमा नेपाली कामदारहरूका लागि धेरै अवसरहरू पर्खिरहेका छन्। छनोट भएका उम्मेदवारहरूले स्वास्थ्य परीक्षण र आपराधिक पृष्ठभूमि जाँच पछि भर्ना प्रक्रियाको अन्तिम चरणमा प्रवेश गर्नेछन्।
स्वास्थ्य परीक्षणमा योग्य ठहरिएका र कुनै आपराधिक रेकर्ड नभएका व्यक्तिहरू दुई महिनापछि चरणबद्ध रूपमा इजरायल जानेछन्। यस द्विपक्षीय सम्झौताअन्तर्गत भर्ना हुने नेपाली कामदारहरूले इजरायली कानुनबमोजिम इजरायली कामदारहरूले सरह न्यूनतम तलब र रोजगारीका सुविधाहरू प्राप्त गर्नेछन्।
