पहाडी भूभागमा हल्का वर्षा, तराईमा मौसम मुख्यतया सफा रहने
काठमाडौँ । नेपाल मौसम विज्ञान विभागका अनुसार बिहीबारसम्म देशको तराई भूभागमा मौसम मुख्यतया सफा रहनेछ ।
विभागका अनुसार हाल देशमा पश्चिमी वायु र मनसुनी वायुको आंशिक प्रभाव छ । हाल देशका हिमाली भूभागमा आंशिक बादल लागेको छ भने देशका पहाडी र तराई भूभागमा मौसम मुख्यतया सफा रहेको छ ।
बुधबार देशका हिमाली र पहाडी भूभागमा आंशिक बादल लाग्ने तथा तराई भूभागमा मौसम मुख्यतया सफा रहनेछ । देशका हिमाली भूभागका साथै बागमती, गण्डकी र लुम्बिनी प्रदेशको पहाडी भूभागका एक, दुई स्थानमा हल्का वर्षा, हिमपातको सम्भावना छ ।
बिहीबार हिमाली भूभागमा साधारणतया बादल लाग्नेछ । देशका पहाडी भूभागमा आंशिक बादल लाग्ने तथा देशको तराई भूभागमा मौसम मुख्यतया सफा रहनेछ ।
गण्डकी, लुम्बिनी, कर्णाली र सुदूरपश्चिम प्रदेशको हिमाली र पहाडी भूभागका थोरै स्थानमा तथा कोशी र बागमती प्रदेशको हिमाली र पहाडी भूभागका एक, दुई स्थानमा मेघगर्जन् चट्याङसहित मध्यमसम्मको वर्षा, हिमपातको सम्भावना रहेको विभागले जनाएको छ ।
